“Mədəniyyət.AZ”
jurnalının növbəti sayı çapdan
çıxıb
Mədəniyyət və Turizm Nazirliyinin nəşri olan “Mədəniyyət.AZ” jurnalının mart sayı işıq üzü görüb. Jurnalın bu sayında Bakıda keçirilən Novruz şənlikləri haqqında rəngarəng material, “Türk dünyasında Novruz bayramı necə qeyd olunur?”, “Novruz - beynəlxalq karnavallar statusunda” yazıları, görkəmli maarifçi Mirzə Abbas Abbaszadənin 1920-ci ilin martında “Azərbaycan” qəzetində çap olunan axır çərşənbə, Novruz ənənələri barədə məqalələri dərc edilib.
“Multikulturalizm ili”nə mühüm töhfə” yazısında BMT Sivilizasiyalar Alyansının 25-27 aprel tarixində Bakıda keçiriləcək VII Qlobal Forumuna hazırlıq, tədbirin əhəmiyyətindən bəhs edilir. Azərbaycan Respublikası millətlərarası, multikulturalizm və dini məsələlər üzrə dövlət müşaviri Kamal Abdulla ilə müsahibə də nəşrin bu sayında yer alıb.
21 mart - Beynəlxalq
Poeziya Günü ilə
bağlı “Ver sözə ehya ki...” məqaləsində
şair və tərcüməçilərin
yaradıcılığından, ədəbi əlaqələrdən
söhbət açılır. Ədəbiyyatda, sənətdə,
ictimai həyatda, elmdə əvəzsiz
xidmətləri olan insanların - Əsgər
ağa Gorani, Ağamusa Nağıyev, Kamal
Talıbzadə, Həsənağa Turabov kimi şəxsiyyətlərin xatirələri
də anılıb. “Dənizin səsini dinləmək istəsəz...”
- Bülbül adına IV Beynəlxalq musiqi
müsabiqəsinin “Qran-pri”
mükafatçısı, İstanbul Opera və Balet
Teatrının solisti Dəniz Yetim ilə müsahibə, Respublika
Gözdən Əlillər Kitabxanası, Azərbaycan Dövlət
Teatr Muzeyi, “Oyuq” teatr studiyası və
s. mövzularda
yazılar da jurnalın səhifələrində
yer alıb.
Mədəniyyət.- 2016.- 15 aprel.- S. 10.