“Burada, həqiqətən, yaradıcı mühit var”

Litvalı xoreoqraf Bakı Xoreoqrafiya Akademiyasında ustad dərsləri keçib

Bakı Xoreoqrafiya Akademiyasında Litvadan dəvət olunmuş məşhur xoreoqraf, bu ölkənin Əməkdar artisti Petras Skirmantas ustad dərsləri keçib. Bir həftə ərzində klassik rəqsin incəlikləri, klassik rəqsdə yeni cərəyanlar və hərəkətlər barədə tələbələrə dərs keçən xoreoqraf, akademiyanın müəllimləri ilə də görüşüb söhbətlər aparıb. Ustad dərslərinin yekununda xoreoqraf ölkəmiz, tədris ocağı ilə bağlı təəssüratlarını bölüşüb.

Azərbaycana hələ 1991-ci ildə qastrola gəldiyini və Opera və Balet Teatrının səhnəsində “Jizel” tamaşasında iştirak etdiyini deyən xoreoqraf illər sonra Bakıda gördüklərinə heyran olduğunu bildirib: “Nə qədər göydələn, yeni tikili olsa da, Bakının öz siması var. Hər bir tikilidə milli üslub və ornamentlər qabarıq şəkildə görünür. Burada olduğum müddətdə Azərbaycan milli mətbəxini, şirniyyatlarını çox sevdim. İnsanlar isə bir başqa aləmdir. Onlar çox mehriban, gülərüz, hər zaman köməyə gələn və fədakardırlar”.

Bakı Xoreoqrafiya Akademiyası barədə danışan qonaq qeyd edib ki, Azərbaycanda xoreoqrafiya sənətinin Qəmər Almaszadə, Leyla Vəkilova, Rəfiqə Axundova, Maqsud Məmmədov, Tamilla Şirəliyeva və digər görkəmli balet ustaları yetişib. Bu yaradıcılıq ənənələri bu gün də yaşamaqdadır: “Ustad dərslərində iştirak edən tələbələr çox diqqətlidir, onlara nümayiş etdirdiyim hər bir hərəkəti düzgün və rahat göstərə bilirlər. Bu işdə akademiyanın peşəkar müəllimlərinin də rolu böyükdür. Müəllimləriniz yüksəkixtisaslı mütəxəssis və əsl peşəkardırlar. Mən özüm də ustad dərsləri zamanı və dərslərdən sonra onlarla apardığım söhbətlərdə çox şey öyrənmişəm. Ümumiyyətlə, akademiyada, həqiqətən, yaradıcı mühit, yaxşı ab-hava var. Akademiyanın rektoru professor Timuçin Əfəndiyevlə, müəllim heyəti ilə maraqlı görüşlərimiz oldu. İnanıram ki, bir neçə ildən sonra Bakı Xoreoqrafiya Akademiyası dünyanın aparıcı xoreoqrafiya akademiyaları sırasında layiqli yer tutacaq”.

Mədəniyyət.- 2016.- 22 aprel.- S. 6.