Mərhum rəssam-rejissorun xatirəsinə həsr olunmuş sərgi

 

Sentyabrın 3-də Port Baku Mallda rəssam-rejissor Nazim Məmmədovun xatirəsinə həsr olunmuş sərgi açılacaq. Sərgidə rəssamın ən məşhur əsərləri nümayiş olunacaq.

Sərgi Afət Bağırova, Orxan Aslanov, İrina Eldarova, Pərviz Hüseynovİrina Qundorinanın iştirakı ilə Port Baku Mallda keçirilən incəsənət festivalı çərçivəsində təşkil olunacaq. Sentyabrın 11-dək davam edəcək sərgiyə giriş sərbəstdir.

Qeyd edək ki, Nazim Məmmədov 1934-cü ildə Bakıda anadan olub. 1957-ci ildə Əzim Əzimzadə adına Dövlət Rəssamlıq Məktəbini və 1961-ci ildə Moskvada Soyuzmultfilmdə animasiya kursunu bitirib. Həmin ildən Azərbaycanfilm kinostudiyasinda animator, 1970-ci ildən isə rejissor işləyib. O həm də rəngkarlıq, qrafika janrı ilə məşğul olub, uşaq kitablarına illüstrasiyalar çəkib.

1988-ci ildə respublikada ilk dəfə beşhissəli Göyçək Fatma cizgi film-operasını yaradıb. Onun adı ən sevimli cizgi filmləri ilə bağlıdır. İlk cizgi filmlərinin müəllifi olan Nazim Məmmədov Azərbaycanda animasiyanın inkişafına əvəzsiz töhfələr verib. O, həmçinin rəsm, dəzgah rəsm, uşaq kitab illüstrasiyası ilə məşğul olub. Rəssamın əsərləri Azərbaycanda və xaricdə tanınır.

Nazim Məmmədov 2004-cü il oktyabrın 29-da vəfat edib.

 

Mədəniyyət.- 2016.- 31 avqust.- S.5.