Sənətdə
keçən ömür
Tanınmış bəstəkar Musa Mirzəyev dünyadan köçdü
Azərbaycanın
mədəni ictimaiyyətinə ağır itki
üz verib.
Tanınmış bəstəkar, Prezident
təqaüdçüsü, Xalq artisti, professor Musa Mirzəyev 2016-cı il
yanvarın 29-da ömrünün 84-cü
ilində vəfat edib.
Sənətkarın vəfatı ilə bağlı Prezident İlham Əliyev, dövlət və hökumət rəsmiləri, mədəniyyət xadimləri adından başsağlığı verilib.
Nekroloqda qeyd olunur ki, Musa Musa (Əli Musa) Abdulla oğlu Mirzəyev 1933-cü il yanvarın 26-da Bakı şəhərində anadan olub. 1947-1951-ci illərdə Asəf Zeynallı adına Bakı Musiqi Texnikumunda oxuyub, 1952-1958-ci illərdə Üzeyir Hacıbəyli adına Azərbaycan Dövlət Konservatoriyasında görkəmli sənətkar Qara Qarayevin sinfində bəstəkarlıq ixtisası üzrə ali musiqi təhsili alıb.
Əmək fəaliyyətinə 1958-ci ildə Azərbaycan Dövlət Radio və Televiziya Verilişləri Komitəsində gənclər xorunun konsertmeysteri kimi başlayan Musa Mirzəyev 1978-ci ilədək burada çalışıb, 1978-1979-cu illərdə isə Azərbaycan Dövlət Filarmoniyasının bədii rəhbəri olub. Sonrakı dövrdə yalnız yaradıcılıqla məşğul olan bəstəkar yaradıcılığını pedaqoji fəaliyyətlə uğurla əlaqələndirərək, 1993-cü ildən ömrünün sonunadək çalışdığı Bakı Musiqi Akademiyasında yeni musiqiçilər nəslinin formalaşdırılması işinə töhfələr verib.
Azərbaycan bəstəkarlıq məktəbinin seçilən nümayəndələrindən biri olaraq Musa Mirzəyev yaratdığı rəngarəng əsərləri ilə milli musiqi mədəniyyəti xəzinəsini daha da zənginləşdirib, ayrı-ayrı janrlarda çoxsaylı əsərlər bəstələyib. Onun yaradıcılığında xüsusən simfonik və kamera musiqisi janrında yazdığı əsərlər mühüm yer tutur. Milli kolorit, zəngin dramatizm bəstəkarın yaradıcılığını səciyyələndirən başlıca cəhətlərdəndir.
Musa Mirzəyevin əsərləri tanınmış musiqi kollektivləri tərəfindən ifa edilərək respublikada və onun hüdudlarından kənarda müəllifinə şöhrət gətirib. Bəstəkarın kamera musiqisindən ibarət müəllif konsertləri sənətsevərlərin rəğbətini qazanıb. Onun Azərbaycan və dünya musiqisinə dair məqalələri yetişməkdə olan nəslin estetik zövqünün püxtələşməsinə öz təsirini göstərib.
Musa Mirzəyevin yaradıcılığı və müasir Azərbaycan mədəniyyəti qarşısında xidmətləri yüksək qiymətləndirilib. Bəstəkar “Şöhrət” və “Şərəf” ordenləri ilə təltif edilib.
Sənətkarla vida mərasimində
mədəniyyət və turizm naziri Əbülfəs Qarayev,
musiqi ictimaiyyətinin tanınmış
nümayəndələri, incəsənət xadimləri iştirak ediblər. Musa
Mirzəyev ikinci Fəxri xiyabanda
torpağa tapşırılıb.
Mədəniyyət.- 2016.- 3
fevral.- S. 6.