Rauf Atakişiyevin
90 illiyinə həsr olunmuş musiqi gecəsi
Fevralın 13-də Mədəniyyət və Turizm Nazirliyinin təşkilatçılığı ilə Müslüm Maqomayev adına Azərbaycan Dövlət Filarmoniyasında görkəmli müğənni, pianoçu, Xalq artisti, professor Rauf Atakişiyevin (1925-1994) 90 illiyinə həsr olunan yubiley gecəsi keçirildi. Gecədə rəsmi şəxslər, diplomatlar, mədəniyyət və incəsənət xadimləri, ictimaiyyət nümayəndələri iştirak edirdi.
Tədbir iştirakçıları əvvəlcə
filarmoniyanın foyesində sənətkarın həyat və
yaradıcılığını əks etdirən fotosərgiyə
baxdılar. Sonra Rauf Atakişiyevin sənət yolunu
əks etdirən videoçarx nümayiş olundu. Yubiley gecəsi Üzeyir
Hacıbəyli adına Azərbaycan Dövlət Simfonik Orkestrinin konsert proqramı ilə davam
etdi. Xalq artistləri Yalçın Adıgözəlov və
Rauf Abdullayevin dirijorluğu ilə Sergey Prokofyevin “Romeo və Cülyetta” baletindən fraqmentlər, “Fortepiano və orkestr üçün 1 saylı konsert
re-bemol-major op.10”, Cüzeppe
Verdinin “Taleyin gücü” operasından uvertüra,
Robert Şumanın “Fortepiano
və orkestr üçün
konsert lya-minor op.54” əsərləri
ifa olundu. Konsertin solistləri Xalq artisti Fərhad Bədəlbəyli və
Murad Adıgözəlzadə
idi.
Qeyd edək ki, 1925-ci il iyulun 15-də Göyçayda dünyaya
gələn sənətkar
uzun müddət Azərbaycan Dövlət Akademik Opera və Balet Teatrının solisti olub, eyni
zamanda 40 ildən çox Azərbaycan Dövlət Konservatoriyasında
(indiki Bakı Musiqi Akademiyası) kafedra müdiri vəzifəsində çalışıb.
Lirik-dramatik tenor səsə
malik olan sənətkar teatrda Əsgər (“Arşın
mal alan”, Ü.Hacıbəyli), Lenski
("Yevgeni Onegin",
P.Çaykovski), Alfred ("Traviata", C.Verdi), Almaviva ("Sevilya bərbəri", C.Rossini),
Faust ("Faust", Ş.Quno), Balaş ("Sevil", F.Əmirov) və başqa partiyaları ifa edib.
Tanınmış ifaçılar nəslinin
yetişməsinə mühüm
töhfələr verən
Rauf Atakişiyev
1994-cü il fevralın 3-də vəfat
edib.
Fariz Hüseynov
Mədəniyyət.- 2016.- 17
fevral.- S. 6.