Nazir müavini İndoneziyanın Azərbaycandakı səfiri ilə görüşüb

Səfirlik ölkəmizdə İndoneziya mədəniyyəti festivalı keçirmək istəyir

Mədəniyyət və turizm nazirinin müavini Ədalət Vəliyev İndoneziyanın Azərbaycandakı səfiri Hüsnan Fanani ilə görüşüb.

Görüş zamanı iki ölkə arasında mədəniyyət və turizm sahələri üzrə əməkdaşlığa dair əldə olunmuş nəticələr müzakirə edilib və əlaqələrin gələcək istiqamətləri barədə fikir mübadiləsi aparılıb.

Ərazisində mindən artıq etnik qrupun nümayəndəsi yaşayan və Azərbaycanla bənzər multikultural dəyərlərə malik İndoneziya dövləti ilə əməkdaşlıq potensialının geniş olduğu qeyd olunub.

2016-cı ilin 7-9 aprel tarixində təşkil olunan 15-ci Azərbaycan Beynəlxalq Turizm və Səyahətlər Sərgisi (AİTF-2016), 19-21 may tarixində keçirilən 22-ci Azərbaycan Beynəlxalq Qida Sənayesi Sərgisi, 1 iyul tarixində baş tutan I Beynəlxalq Dolma Festivalı və 20 iyulda keçirilən Şəki III Beynəlxalq Şirniyyat Festivalında iştirak etmiş səfir Azərbaycan xalqının qonaqpərvərliyindən və ölkənin zəngin mədəniyyətindən məmnunluğunu bildirib.

Səfir H.Fanani bu ilin oktyabr yaxud, noyabr ayında ölkəmizdə İndoneziya mədəniyyəti festivalının təşkil edilməsinə nazirlik tərəfindən dəstək göstərilməsini xahiş edib.

Nazir müavini Ə.Vəliyev bildirib ki, hər hansı mədəniyyət tədbiri müvafiq tədbirlər planına əsasən həyata keçirilir. 2016-cı il üzrə bir sıra tədbirlərin, o cümlədən 15-24 sentyabr tarixində “Üç məkan” II Şəki Beynəlxalq Teatr Festivalı, 18-27 sentyabr tarixində VIII Üzeyir Hacıbəyli Beynəlxalq Musiqi Festivalı, 22-30 oktyabr tarixində Bakı Caz Festivalı və 7-8 noyabr tarixində IV Bakı Beynəlxalq Teatr Konfransının təşkili nəzərdə tutulub. Bununla yanaşı, Azərbaycanda İndoneziya mədəniyyəti festivalının keçirilməsinə dair nazirlik tərəfindən müvafiq köməkliyin göstəriləcəyi diqqətə çatdırılıb.

H.Fanani nazirlik və səfirlik arasında məhsuldar əlaqələrə və səmimi qəbula görə minnətdarlığını bildirib. Görüş iştirakçıları tərəfindən iki ölkə arasında mədəniyyət və turizm sahələrində əməkdaşlığın inkişafında maraq ifadə edilib.

Mədəniyyət.- 2016.- 27 iyul.- S. 3.