Şabranda Xaqaniyə həsr olunmuş poeziya gecəsi

İyunun 11-də Şabran şəhərində klassik ədəbiyyatımızın görkəmli nümayəndəsi Xaqani Şirvaninin yaradıcılığına həsr olunmuş ənənəvi poeziya gecəsi keçirilib.

Tədbir iştirakçıları əvvəlcə ümummilli lider Heydər Əliyevin, daha sonra şairin abidəsini ziyarət ediblər.

Azərbaycan Yazıçılar Birliyinin (AYB) və rayon İcra Hakimiyyətinin təşəbbüsü ilə Şabrandakı Xaqani Şirvani adına poeziya evində keçirilən tədbirdə şairin yaradıcılığından danışılıb, şeir və qəzəlləri səsləndirilib.

AYB-nin sədri, Xalq yazıçısı Anar, Milli Məclisin deputatları - filologiya elmləri doktoru Nizami Cəfərov, yazıçı-publisist Aqil Abbas, şair Qəşəm Nəcəfzadə və başqaları çıxışlarında Azərbaycanın dünyada filosofların, alimlərin, şairlərin vətəni kimi tanındığını qeyd ediblər.

Bildirilib ki, Xaqani Şirvani klassik Şərq poeziyasının bir çox janrlarında yüksək sənətkarlıq nümunələri yaradıb. Əsərləri tezliklə Yaxın və Orta Şərq ölkələrinə yayılaraq müasirlərinin diqqətini cəlb edib. Bədxah saray şairlərinin hücumlarına məruz qalan şair Şirvanı tərk etməyə məcbur olub. Sonra həbs olunaraq Şabran qalasına salınıb və 7 ay burada saxlanılıb. “Şabran şəhəri” Tarixi Qoruğunda aparılan qazıntılar zamanı Xaqani Şirvaninin saxlanıldığı həbsxananın qalıqları da aşkara çıxarılıb.

Rayon İcra Hakimiyyətinin başçısı Novruz Novruzov bildirib ki, xalqımız Xaqani Şirvani kimi ədibləri ilə fəxr edir və bu irsi daim qoruyub saxlayır. Rayonda Xaqani Şirvani adına Poeziya evinin yaradılmasının gənc nəslin ədəbiyyata marağının artırılması baxımından böyük əhəmiyyət daşıdığı qeyd olunub.

Mədəniyyət.- 2016.- 15 iyun.- S.5.