Bütün sevgilərdən ötə -
“Ar-namuslarla əkilən,
qeyrətlərlə bitən Vətən!..”
Dırnaq işarəsi içərisindəki misra hələ “çağırışçı” olan bir cavana məxsus. Mənim qeyri-işgüzar “Lələtəpə ezamiyyəti”mdən bir yadigar. Bir ay öncə getdim ora ki, real qəhrəmanlarımızın işğalçıdan saldırdığı məlum “aprel qəniməti”mizə baxıb, neçə illik həsrətimə bir göz məlhəmi edəm, həmin oğlan - düşməndəki ərazilərimizin hamısını azad etməyə namizəd igidlərimizdən biri, bir neçə belə SÖZ ilə qəlbimə də məlhəm çəkdi...
Dərhal Bakıya döndüm ki, görüb-eşitdiklərim barədə qəzetimizə “proletariatın sabiq dahi rəhbəri V.İ.Leninin məşhur “Aprel tezisləri”ndən yüz il sonra, bəşəriyyətin sadiq dahi rəzili erməninin növbəti aprel təxribatı” səpkisində müxtəsərcə bir yazı yazım, Azərbaycanlıların və Digər Türkdilli Xalqların Əməkdaşlıq Mərkəzi və Azərbaycan Mətbuat Şurasının birgə keçirdiyi “Milli Ordumuzun aprel sınağı: vətənpərvərliyin Qarabağ vəhdəti və yeni qəhrəmanlıq salnaməsi” müsabiqəsini görüb, mövzunun tərz-ərz əhvalını və həcm “val”ını dəyişməli oldum.
...Dilçilərimizin ümumi qənaətinə görə, cümlələrin iki baş üzvündən ikincisi -
“Xəbər”...
Hə, biri mərd-müdafiəkar, digəri mürtəd-təcavüzkar tərəf olmaqla, cümlənin birinci (və canlı) baş üzvü hesab edilən mübtədaların bəlli “aprel müharibəsi” və bu savaşa dair (həcm naminə bir qədər “stilizə” edəcəyim) rəsmi, əcnəbi xəbərlər.
Öncə Müdafiə Nazirliyindən:
Erməni silahlı bölmələri cəbhənin müxtəlif istiqamətlərində iriçaplı silahlardan və artilleriya qurğularından istifadə etməklə, sutka ərzində atəşkəs rejimini ümumilikdə 121 dəfə pozmuş, Azərbaycanın mülki əhali məskənlərini və Silahlı Qüvvələrimizin mövqelərini atəşə tutmuşlar.
* * *
Qoşunlarımızın dəqiq cavab atəşləri nəticəsində düşmənin işğal etdikləri ərazilərimizdəki komanda-qərargah məntəqəsi və çoxlu sayda hərbi qulluqçusu - polkovnik və general rütbəli zabitləri məhv edilmişdir.
* * *
Azərbaycan Silahlı Qüvvələrinin həyata keçirdiyi tədbirlər və atəş zərbələri nəticəsində böyük itkilərə məruz qalan erməni hərbi qulluqçuları silah-sursatlarını ataraq öz mövqelərindən qaçırlar.
* * *
MN-ə ünvanlanan çoxsaylı müraciətlərdə minlərlə vətənpərvər, hətta əsgəri xidmətə yaşı çatmayan gənclər, ehtiyatda olan hərbi qulluqçular, müharibə əlilləri və veteranları səfərbərliyə hazır olduqlarını bildirirlər.
* * *
Prezidentin Mətbuat xidmətindən:
Azərbaycan Prezidenti İlham Əliyev aprel döyüşlərində yaralanmış əsgər və zabitlərimizin müalicə və müayinə edildikləri tibb müəssisələrində olmuş, göstərdikləri igidliklərə görə onlara təşəkkürünü bildirmiş, tezliklə sağalmalarını və qalan torpaqlarımızın da azad edilməsində yeni uğurlar arzulamışdır.
* * *
Azərbaycan Prezidenti İlham Əliyev və xanımı Mehriban Əliyeva mayın 1-də cəbhə bölgəsinə səfər çərçivəsində Ağdamın Mahrızlı kəndinə gəlmiş, aprel hadisələri nəticəsində yaranmış vəziyyətlə tanış olmuşlar. Prezidentin “Sizi ürəkdən salamlayır, öz hörmət və məhəbbətimi ifadə edirəm. Siz burada düşmənlə üz-üzə yaşayırsınız, yaradırsınız, qurursunuz” sözlərini böyük ruh yüksəkliyilə qarşılayan sakinlər Ali Baş Komandanın Tərtər və Ağdamda 500-dən çox evin qismən, 100-dən çoxunun isə tamamilə dağıdılması ilə ilgili dediyi “Budur, erməni faşizminin eybəcər sifəti. Azərbaycan Ordusu heç vaxt mülki əhaliyə qarşı müharibə aparmamışdır, aparmır və aparmayacaq. Ancaq Ermənistan, görün, hansı çirkin işlərlə məşğuldur” fikrini eşidirkən böyük milli-mental fəxarət hisləri də yaşadılar...
Xaricdən:
Fransa Senatının senatoru xanım Silvi Qo-Şavan “aprel müharibəsi” ilə bağlı bəyanatında Azərbaycanın Dağlıq Qarabağ bölgəsi və ətraf 7 rayonunu işğal etmiş Ermənistanın son təxribatlarını qəti şəkildə pisləməklə bərabər, təcavüzkar ölkədən müntəzəm xarakter almış təxribatları dayandırmağı, silahlı qüvvələrinin işğal ərazilərindən dərhal və qeyd-şərtsiz çıxması ilə bağlı BMT TŞ-nin dörd qətnaməsini icra etməyi tələb edib.
* * *
Misirli politoloq Əhməd Muslimani (geniş tamaşaçı auditoriyalı “Dream” telekanalında): “Aprelin 2-dən 3-nə keçən gecə Ermənistan ordusu 20 ildən çoxdur işğal altında saxladığı Azərbaycan ərazisində - “qara bağ” məna-mənşəli qədim Qarabağ torpağında yeni təxribatlar törətmiş, Azərbaycan Ordusunun güclü cavab atəşləri nəticəsində ön mövqelərdən xeyli geri çəkilmişdir”.
Və iki gəncin birgə “manifest”indən...
Yox, bu haqda lap axırda.
İndilikdə, “bütün dilçilərimizin
ümumi qənaətinə
görə, cümlələrin
iki baş üzvündən biri - xəbər” fikrimin davamı: Bütün Vətənçilərimizin - uca şəhidlərimizin,
qazi-qəhrəman hərbçilərimizin,
milli məmur və ziyalı, halal fəhlə və kəndlilərimizin
şəhadəti-qənaətlərinə
görə, bütün
mübtəda-xəbərlərin ən ali
baş üzvü -
Vətən!..
Eşqdə, məhəbbətdə, sevgidə heç bir bəndənin bir-birinə qısqanmadığı
yeganə Canani-Can - Azərbaycan!..
“Anamın kitabı” duyğulu, “Dur ayağa, ya azad ol, ya
da ki yan...”
qayğılı, “Aləm
cənnətə dönsə,
Yaddan çıxmaz Qarabağ!” havalı Vətən...
Hər millət üçün
əzizdən-əziz olan
bu sevgili məkan-varlıqlara dair dünyanın fikir böyükləri nələr
deməmiş! “Ailəmiz
uğrunda tər, dostumuz uğrunda göz yaşı, Vətənimiz uğrunda qan tökməli”, “Çox şəhid verən və fədakarlıq göstərən
bir ölkə istədiyi səviyyəyə
çata bilər” (M.Qandi), “Ən böyük sevgi Vətən sevgisidir və bu məhəbbət
fövqəladə vəziyyətlərdə,
ölüm-dirim çağlarında
daha qabarıq aşkara çıxır”
(Q.Lebon)...
Bəs, bizim torpaqlar hesabına vətənlənmiş, sabiq,
çağdaş və
belə gedərsə
gələcək düşmənimiz
erməni vətənpərvərliyi?! Dünya
mütəfəkkirləri eşitmədikləri bu suala da cavab
veriblər: “Başqa xalqların haqlarını
qəsb edən xalq öz azadlıq
və səadətinə
qovuşa bilməz” (İ.Bentam), “Müharibə
dinc dövrün problemlərindən qorxaqcasına
qaçmaqdır” (T.Mann)...
Və...
iştirakçılarından
biri olduğum bu müsabiqənin növbəti elementi üçün keçirdiyim
xəyali “avtomüsabiqə”mdə
belə bir yarımbaşlıq qalib gəldi: -
“Üç qardaş”...
Milli azadlıq hərəkatı
və... milli müharibə (1941-45-inkinə nisbətdə)
illərimizdə əsil
milli namus-qeyrətlə
iştirak edənlərin
hamısını doğma
qardaş-bacı hesab
etdiyimdən, bu son mübarək qəzamızın
üç Milli Qəhrəmanını qədim
nağıl-dastan və
ulu dağ adlıqlarımızdan gələn
belə bir tərkiblə yad etdim...
Biri Qubadlı, biri Neftçala, biri Sabirabad doğumlusu olsa da, hər
üçü böyük
Vətən Oğlu, bütün Azərbaycan Qəhrəmanı.
Səkkizinci sinifə qədər
Qubadlı rayonunun Başarat kənd orta məktəbində oxumuş, təhsilini C.Naxçıvanski adına
hərbi liseydə davam etdirib, H.Aslanov adına Hərbi Məktəbi bitirmiş, aprel ayının əvvəlində
“Lələtəpə” yüksəkliyinin
azad edilməsi əməliyyatı zamanı
göstərdiyi şücaətə
görə, müdafiə
nazirinin əmri ilə vaxtından əvvəl polkovnik hərbi rütbəsi təqdim olunmuş, nəhayət, həmin döyüşlərdə vətənpərvər-vətəndaşlığın
ən yüksək qazi-qəhrəmanlıq mərtəbəsinə
yüksələrək ölkə
Prezidentinin sərəncamı
ilə Azərbaycanın
Milli Qəhrəmanı
adına layiq görülmüş Şükür
Nəriman oğlu Həmidov döyüş
yoldaşlarının “Qaçaq
Nəbinin Qoçaq yurddaşı” öygüsü
ilə də təltiflənib...
Samid Gülağa oğlu İmanov ilə Murad Telman oğlu
Mirzəyev isə, tək elə ucadan uca şəhid-qəhrəmanlıq
talelərilə deyil,
təhsil aldıqları
hərbi məktəbləri
fərqlənmə ilə
bitirmələri, xarici
ölkələrdə keçdikləri
təlim-məşq təmrinləri,
hərbi hissələrdə
yüksək post tutmaları
ilə də qardaşlıq ediblər.
Hər ikisi iki dəfə
“Qüsursuz xidmətə
görə”, “Hərbi
xidmətdə fərqlənməyə
görə” və Silahlı Qüvvələrin
yubiley medalları ilə təltif edilib. Şahidlikdə
xeyli oxşar-bərabər
olmuş bu Vətən-Vətəndaşlıq qardaşlarının şəhidlikdə
fərqləri də olub: Muradın düşmən nəzarətindəki
ərazidə qalmış
cəsədi Beynəlxalq
Qırmızı Xaç
Komitəsinin vasitəçiliyilə
Azərbaycan tərəfə
təhvil verilib.
Belələrinin ən ümumi oxşarlığının əsil
vəsfi isə böyük Atatürkün
sözlərində: “Hər
hansı bir ordunun dəyəri onun zabit və
komanda heyətinin dəyəri ilə ölçülür”. Bu an
fransız mütəfəkkir
Pyer Buastın “Qəhrəmanları olmayan
ölkə bədbəxtdir”
və Prussiya kralı Fridrixin “Qələbələr sipərlərin
möhkəmliyinə deyil,
komandirlərin cəsarət
və ləyaqətinə
bağlıdır” fikirləri
də yada düşür...
Və nəhayət, himi başlıqda qoyulmuş yarımbaşlıq; -
Mənim
bloknot “ov”um...
Bu parçanın adı: “Üçrəngli Lalə...”
O gündən-bu günə
bəndənizə bəxş
etdiyi incə-incə hal-təblərə binaən,
lütfən, bu emosional-sentimental hissəni
“esse” kimi də qəbul etmənizi istərdim...
“...Böyük bir kəndin yuxarı başında, elə də hündür olmayan, eşqlə baxanda isə, bu elatın qəlbi kimi göylərə ucalan bir dağ. Gündoğan yanı yastı, günbatanı sivri.
Üstündə özünəbənzər bir təpə olduğundan, dədələr
onu “Təpəli dağ” adlandırıb.
Bundan irəliki davada ac-yalavac nəvələrilə
tərə yığmağa
gedən nənələrsə
ona “Pəpə təpə” deyərmişlər.
Deyəsən, “And təpə”
adına da hamilədi bu dağ...
İndilər ora yalnız yaz çağları gedirlər; uşaqlar oynaqlamağa, qız-gəlin
tərə yığmağa,
sevənlər fürsətə...
Neçə illərdi onların arasında qarşı dağların o üzündən
qaçıb gəlmişlərdən
də olur və onlardan bir ərgəni o təpənin yastısına
qalxır, bir ərəni sivrisinə. Aralarındakı məsafə mehri-məhəbbət
qədər yaxın,
dağətrafı “cəmiyyətdə”
söz-bez yaratmayacaq qədər uzaq. Danışıqlarına görə, qız
bu yay universitetə
gedəcək, oğlan
orduya.
Bu kəndin ağırları
onları “qoşa sinədəftər” adlandırıb,
yüngülləri “qaçaq
yurda qoçaq-qoçaq
baxanlar”...
Həmişə arın-arxayın söhbətləşib,
hərdən də “deyişən” vergili cütlük bu təbii kürsüdə
ucadan danışır,
qızın bu saat “parter”də onlara göz qoyan rəfiqələrindən
biri demişkən, “sözü üfürə-üfürə
işlədirlər”. Bu yeganə atmaca da elə qızın
öz şeirindəki
“Ay suyu üfürə-üfürə
içən, Sözü
də bişirə-bişirə
desən!” misralarından
doğulub. Oğlanın
“Aprel - 2016” şeirindəki
“Ar-namuslarla əkilən,
Qeyrətlərlə bitən
Vətən!” misraları
isə, öncəki deyişmələrdən birindəki
“Bilsən nələr
düşünürəm gecələr, Xəyalımı
məhkəməyə verərsən”
qoşmasından adına düşmüş
xalı yuyub...
Bu gün də - bir-birini ötəkilərdən
daha qəlbən süzmələrini gizlətməyə
çalışsalar da,
həmişəki kimi
qəlbidən danışırlar:
- Ora bax, Albay!.. Nooldu, niyə diksindin?
- Heç, Susay... “Ora bax” sözünü
“Qarabağ” kimi eşitdim...
- Hə, iki həftə
qabaq oralar büsbütün qar, indi isə... Yenə diksindin...
- Bunun səbəbi çox, izahı isə, deyəsən, yox... Birincisi, o gün martın
axırları idi, indi mayın sonları. İkincisi, ötən “Aprel
atəşləri”mizə təşnəlikdən
ayrıla bilmirəm.
Üçüncüsü, keçən həftə
oralara baxıb dediyin beyt düşdü
yadıma: “Bir qar da yağmadı
barınaq, Üstüylə
yeriyək - sırınaq!..”
- Hə, o gün oralar büsbütün qar, indi tala-tala
lalə! Yenə alındın, Albay...
- Qulağım yenə yanıldı - “tala-tala lalə”ni “Lalətəpə”
eşitdi...
- O talalardan biri mənim atamın qanından bitib, biri sənin atanın...
- O biriləri isə - tanımadığımız ataların...
- Sənin gözlərindəsə
onların yolu... Daha danışma, Albay, sus...
- Susa bilmərəm, Susay! ...İnşallah, tezliklə
o “Lalətəpə”dən o yankı xalı talalarda da üçrəngli
“Lalə”lər ucaldığını
görərsən! Sonra gəlib
burda sən laləni dərəcəm.
Gələmməsəm, oralarda daha
bir lalə talası görəcəksən.
İşdi-şayəd, mən
gəlib səni dərəmməsəm, haçansa
sən gəlib məni dərərsən...”
Tahir Abbaslı
Mədəniyyət.- 2016.- 17 iyun.-
S.12.