Görkəmli tarzən Sadıqcanın 170 illik yubileyi qeyd olundu

Noyabrın 22-də Mədəniyyət və Turizm Nazirliyinin təşkilatçılığı ilə Beynəlxalq Muğam Mərkəzində görkəmli tarzən Sadıqcanın 170 illiyinə həsr olunmuş yubiley gecəsi keçirildi.

Gecənin aparıcısı Əməkdar incəsənət xadimi Sərdar Fərəcov çıxış edərək görkəmli tarzən haqqında məlumat verdi. Bildirildi ki, Mirzə Sadıq Əsəd oğlu (Sadıqcan) 1846-cı ildə Şuşa şəhərində anadan olub. Bütün şuşalılar kimi sənətkar da kiçik yaşlarından xalq mahnılarının və muğamlarımızın ifasını mənimsəyir və onları müfəssəl şəkildə ifa etməyə başlayır. Onun ilk müəllimi Şərq musiqisinin mahir bilicisi kimi tanınan Xarrat Qulu Məhəmməd oğlu idi.

Sənətin sirlərini ustadından əxz edən Mirzə Sadıqcan tarı təkmilləşdirən sənətkar kimi tezliklə Qafqazda və İranda tanınır.

Tədbir tanınmış ifaçıların konsert proqramı ilə davam etdi. Konsertdə Azərbaycan Radiosu və Televiziyasının "Xatirə" xalq çalğı alətləri ansamblının müşayiəti ilə muğamlarımız, xalq və bəstəkar mahnıları səsləndirildi.

Mədəniyyət.- 2016.- 23 noyabr.- S.2.