Muğam nəzəriyyəçilərinin müşayiətçilərdən bəhrələnməsi vacibdir

 

Milli Konservatoriyada seminar

 

Noyabrın 21-də Azərbaycan Milli Konservatoriyasında Bayatı-Şiraz muğamının Bərdaşt şöbəsi mövzusunda seminar keçirildi. Seminarı konservatoriyanın elmi işlər üzrə prorektoru Lalə HüseynovaMilli musiqinin tədqiqi elmi-tədqiqat laboratoriyasının rəhbəri Abbasqulu Nəcəfov aparırdı.

Lalə Hüseynova seminarı açaraq bildirdi ki, bu gün təhsil ocağında bədii mühit yüksək səviyyədədir və artıq elmi mühit də formalaşmaqdadır: Konservatoriyanın professor-müəllim heyətinin muğamşünaslığa, musiqinin müxtəlif janrlarının tədqiqinə həsr etdikləri məqalələr oxucular və ictimaiyyət tərəfindən rəğbətlə qarşılanır. İnanırıq ki, seminarda müzakirələr nəticəsində müəyyən məqamlara aydınlıq gətiriləcək.

Konservatoriyanın rektoru, Xalq artisti, professor Siyavuş Kərimi belə tədbirlərin keçirilməsinin muğam sənətinin inkişafına xidmət etdiyini vurğuladı.

Xalq artistləri Alim Qasımov, Möhlət Müslümov, Əməkdar artist Vamiq Məmmədəliyev və başqaları çıxış edərək mövzu ətrafında fikirlərini bölüşdülər. Bildirildi ki, Bayatı-Şiraz Azərbaycanın yeddi əsas muğam dəstgahlarından biridir. Muğamın Bərdaşt şöbəsi özünəməxsus cəhətləri ilə seçilir.

Tədbirdə müqayisə üçün mərhum xanəndə Baba MahmudoğluAlim Qasımovun ifasında lent yazıları da səsləndirildi. Hər iki ifa ətrafında fikir mübadiləsi aparıldı. Tədris proqramında Bərdaşt şöbəsinin öyrədilməsi ilə bağlı rəylər dinlənildi. Qeyd olundu ki, Bərdaşt ifaçının səs imkanını nümayiş etdirir və xanəndənin ustalığından asılıdır. Muğam sənəti haqqında nəzəriyyəçilərin müşayiətçilərdən bəhrələnməsi də vacib şərtdir. Bərdaşt şöbəsinin gələcəkdə tədrisə daxil edilməsi diqqətdə saxlanmalıdır.

 

L.Azəri

 

Mədəniyyət.- 2016.- 23 noyabr.- S.4.