“Üç məkan"
II Şəki Beynəlxalq Teatr
Festivalı başa çatdı
"Vaqif"lə "yeni
görüşlərədək" dedik,
əlvida demədik
Sentyabrın 22-də “Üç məkan" II Şəki Beynəlxalq Teatr Festivalı başa çatdı. Sentyabrın 15-dən davam edən teatr bayramının sonuncu günü səhnə festival sahiblərinin ixtiyarında idi.
S.Rəhman adına Şəki Dövlət Dram Teatrı Səməd Vurğunun "Vaqif" pyesinin motivləri əsasında hazırlanmış eyniadlı tamaşanı təqdim etdi. Tamaşaya yaradıcı fəaliyyətini Moskvada davam etdirən Azərbaycanın Əməkdar artisti Mərdan Feyzullayev quruluş verib. Məşhur dram əsərinin mətninə əsl gerçək tarixi faktların əlavə olunduğu mənzum mətnin müəllifi Vaqif Aslan və Mərdan Feyzullayevdir.
Tamaşada iki böyük qonşu dövlət arasında çırpınan Azərbaycan xanlıqlarının müstəqil dövlətçilik istəyi ön plana çəkilib. Pyesdə bu xəttin inkişafına xidmət etməyən yanaşı xətlər və personajlar - o cümlədən bütün qadın obrazları ixtisara salınıb. Əsas rollarda əməkdar artistlər Əbülfət Salahov, Xanlar Həşimzadə və İqrar Salamov, aktyorlar İlyas Əsədov, Akif Yusifov, Aydın Əlibabayev və Rəhim Qocayev çıxış edirlər.
Çox diqqətli və həssas, o cümlədən hər hansı teatr yeniliklərinə açıq olan Şəki tamaşaçıları doğma kollektivin səhnə əsərini də alqışlarla qarşıladılar.
Tamaşadan sonra festivalın bağlanış mərasimi
oldu. Şəki Şəhər İcra
Hakimiyyətinin başçısı
Elxan Usubov çıxış edərək
festivalın təşkilində
əməyi keçən
hər kəsə təşəkkürünü bildirdi. Şəki teatrının kollektivinə
şəhər İcra
Hakimiyyətinin və
Mədəniyyət və
Turizm Nazirliyinin xatirə hədiyyəsi və diplomu təqdim olundu. Həmçinin Şəki Şəhər
İcra Hakimiyyətinin
Mədəniyyət və
Turizm Nazirliyinə xatirə hədiyyəsi nazirliyin İncəsənət
şöbəsinin Teatr
sektorunun baş məsləhətçisi Vəfa
Novruzovaya təqdim edildi.
Bununla da "Üç məkan"
II Şəki Beynəlxalq
Teatr Festivalı yekunlaşdı. Xatırladaq ki, Mədəniyyət və Turizm Nazirliyi, Azərbaycan Teatr Xadimləri İttifaqı və Şəki Şəhər
İcra Hakimiyyətinin
təşkilatçılığı ilə gerçəkləşən
festivalın proqramına
yeddi ölkədən
(Azərbaycan, Türkiyə,
Rusiya, Gürcüstan,
Ukrayna, İran və Birləşmiş Ərəb Əmirlikləri)
12 teatrın tamaşaları
daxil idi. Təşkilatçılardan asılı olmayan
bir sıra səbəblər üzündən
İstanbul Bələdiyyə
Teatrının Bakıda
oynayacağı tamaşalar
təxirə salındı.
Qalan tamaşaların 8-i Şəki
şəhərində, 3-ü Mingəçevirdə göstərildi.
Xoşluqla qal, gözəl və qədim Şəki! Növbəti festivallarda görüşənədək!
Gülcahan Mirməmməd
Şəki
Mədəniyyət.- 2016.- 23
sentyabr.- S.2.