“Azərbaycanın milli musiqi alətləri: keçmişimiz, bu günümüz

 

 

   Bakıda elmi-praktiki konfrans keçirilib

  

   Aprelin 4-də Bakıda Standartlaşdırma, MetrologiyaPatent üzrə Dövlət Komitəsi və Mədəniyyət və Turizm Nazirliyinin birgə təşkilatçılığı ilə “Azərbaycanın milli musiqi alətləri: Keçmişimiz, bu günümüzmövzusunda elmi-praktik konfrans keçirilib.

   Konfransda çıxış edən Dövlət Komitəsinin sədr müavini Niyazi Rəhimov tədbirin əhəmiyyətindən söz açıb. Bildirib ki, əqli mülkiyyət hüquqlarının qorunması təkcə sənaye və ticarət kontekstində deyil, müasir dövrdə mədəniyyət sferasında da aktuallığını qoruyur: “Əqli mülkiyyətin həm iqtisadi, həm sosial-elmi, həm də mədəni əhəmiyyəti var. Patent hüququ obyektlərinin mühafizəsi sənayenin effektivliyinə təsir etməklə yanaşı, ölkədə elmi biliklərin aşılanmasına, mədəni irsin qorunmasına, tarixən əldə olunmuş nüfuzun, intellektual komponentlərin gələcək nəsillərə ötürülməsinə mühüm vasitədir”.

   N.Rəhimov qeyd edib ki, 10-dək ənənəvi musiqi aləti üzərində müəyyən yeniliklər, təkmilləşdirmələrlə bağlı ixtiraçılıq hüquqları qorunur. Bu həm də Azərbaycanın mədəni irsinin, ənənəvi musiqi alətlərinin bir daha təbliği və milli mənsubiyyətini vurğulayan bir amildir.

   Mədəniyyət və turizm nazirinin müavini Ədalət Vəliyev Azərbaycanın zəngin musiqi sənətinin çoxəsrlik inkişaf tarixinə malik olduğunu, ölkənin musiqi diyarı kimi tanındığını vurğulayıb. Bildirib ki, xalq musiqi yaradıcılarının Azərbaycan musiqisinin inkişafında böyük xidmətləri olub.

   Nazir müavini deyib ki, tarixən Azərbaycan musiqisinə, milli mətbəxinə, tarixinə, bütövlükdə mədəni dəyərlərinə vandal münasibəti ilə seçilən ermənilər musiqi alətlərimizi də vaxtaşırı özününküləşdirməyə, milliləşdirməyə, bir sözlə, erməni musiqi alətlərinə çevirməyə çalışıblar. “Nazirlik digər əlaqəli dövlət qurumları ilə birgə bu istiqamətdə lazımi addımlar atır. Bundan sonra da bu işlər davam edəcək. Azərbaycan müstəqillik əldə etdikdən sonra ölkəmizdə musiqi alətlərinin inkişafı və təkmilləşdirilməsi ilə bağlı vacib addımlar atılıb”, - deyə Ə.Vəliyev əlavə edib.

   Müəllif Hüquqları Agentliyinin sədri Kamran İmanov bildirib ki, erməni plagiatının kökləri ərazi iddiaları ilə sıx bağlıdır. Halbuki ermənilərin bu gün mənimsəmək istədikləri tar, kamança, balaban, zurna, ud kimi Azərbaycan Şərq musiqi alətləri onların Cənubi Qafqazda məskunlaşmasından çox əvvəl yaranıb. O, xalq musiqisi xəzinəsinə daxil olan xalq mahnılarının, milli musiqi alətlərinin, Azərbaycan mətbəxinə daxil olan xörək növlərinin və digər mədəniyyət nümunələrinin ermənilər tərəfindən mənimsənilərək özününküləşdirilməsinə dəfələrlə cəhd edildiyini, lakin bu cəhdlərin qarşısının alındığını və milli-mənəvi dəyərlərin qorunduğunu söyləyib.

   K.İmanov bildirib ki, Müəllif Hüquqları Agentliyində 18 musiqi aləti qeydiyyatdan keçirilibonlara şəhadətnamə verilib.

   Konfransda Azərbaycan Milli Konservatoriyasının rektoru, Xalq artisti Siyavuş Kərimi, Mədəniyyət və İncəsənət Universitetinin rektoru, professor Fərəh Əliyeva, Aşıqlar Birliyinin sədri, Əməkdar elm xadimi Məhərrəm Qasımlı, Azərbaycan Dövlət Filarmoniyasının direktor müavini Afət Mikayılov, Beynəlxalq Muğam Mərkəzinin direktoru Murad Hüseynov və digərləri çıxış ediblər.

   Tədbirdə “Mədəniyyətin ənənəvi ifadəsinin patentlə qorunmasının xüsusiyyətləri”, “Milli musiqi alətlərinin təkmilləşdirilməsi istiqamətləri və problemləri”, “Azərbaycanın qədim musiqi alətlərinin bərpa ənənələri”, “Saz aləti tarixi-semiotik informasiyanın daşıyıcısı kimi” və digər mövzularda məruzələr dinlənilib.

 

 

Mədəniyyət.- 2017.- 5 aprel.- S.4.