“Jizel” baleti azərbaycanlı xoreoqrafın quruluşunda

Fevralın 10-da Sankt-Peterburq Dövlət Akademik Mariinsk Teatrının Primorsk səhnəsində Adolf Adanın “Jizel” baleti nümayiş etdiriləcək. Səhnə əsərinin quruluşçu baletmeysteri həmyerlimiz Eldar Əliyevdir.

Bakıda anadan olan E.Əliyev Bakı Xoreoqrafiya Məktəbini bitirib, 1979-1992-ci illərdə Mariinsk Teatrının aparıcı solisti olub. Sonralar ABŞ-ın “Ballet Internationale” truppasına rəhbərlik edib. Praqa, Seul, Nyu-York və Pekində keçirilən beynəlxalq balet müsabiqələrinin münsiflər heyətinə daxildir. 2016-cı ildə Mariinsk Teatrının Primorsk səhnəsinin baş baletmeysteri təyin edilib. Çinin Şenyan Dövlət Konservatoriyasının fəxri professorudur.

Mariinsk Teatrının Primorsk səhnəsi Uzaq Şərqdə ən müasir və Rusiyanın ən gənc teatrlarından biridir.

Mədəniyyət.- 2017.- 10 fevral.- S.4.