Bu dünyada
hər tərəfə qatarlar gedər...
- Şəfəq xanım, Qurban, siz, otuz-qırx il bir yerdə yaşamış adamlarsız... Bax, bu stansiyada baş verən söz-söhbət, qarşıdurma bəlkə də sizin ilk mübahisənizdir. Qurban, sən, Şəfəq xanımın dediklərini əvvəlcə ciddiyə almırsan, zarafat kimi qəbul edirsən. Elə burada, səhnənin bu küncündə oynamaq lazımdır. Xahiş edirəm, əlində kanistr təzədən, kulisdən bir də gəl... Başladıq. Nəsibə xanım, siz də baxın, mizanı yadda saxlayın. Sonra bu yeri sizinlə təkrar edəcəyik...
...Martın 31-də qarşılayacağımız «Ünvansız qatar»ın məşqindəyik. Əli Əmirlinin pyesinə Azərbaycan Dövlət Gənc Tamaşaçılar Teatrının səhnəsində teatrın baş rejissoru, Əməkdar incəsənət xadimi Bəhram Osmanov quruluş verir. 1988-ci ildə azərbaycanlıların Ermənistan Respublikasındakı dədə-baba yurdundan qaçqın düşməsi prosesinə, həmin günlərdə soydaşlarımızın yaşadığı drama həsr olunmuş əsərin ən gərgin, ən əsəbi səhnəsinin məşqinə gəlib çıxmışıq. Ermənistandan çıxıb Azərbaycana gələn qaçqın dolu qatar bizim ərazidə, çöllükdə dayanıb. Həyat düzəni qəfil, həm də namərdcəsinə pozulmuş, varını, yurdunu, malını nədir, əzizlərini itirmiş insanlar bu «dayanacaqda» çox olaylarla üzləşirlər. Onların arasında Bədir, həyat yoldaşı Xoşbəxt və bir ay əvvəl nənəsi ilə Bakıdan kəndə gələn Ayla da var. Əslində sabahına arxayın olan elə Bədirgildir. Çünki onların yeganə qızı Raifə Bakıda yaşayır. Savadı, fərasəti ilə seçilən gənc qadın biznesmendir, topdağıtmaz evi, ayağının altında maşını var, atası demişkən, heç ərinin qazancına da ehtiyac duymur. Bədir kişiyə təkcə ailəsini Bakıya salamat çatdırmaq lazımdır. İstəyir qatar yerindən tərpənsin, istəyirsə, heç tərpənməsin. Baha da olsa, maşın danışıb, sabah özlərini Raifəyə çatdıracaqlar...
Elə ər-arvad arasında əsl münaqişə burada başlayır. Demə, Xoşbəxtin zənn etdiyi kimi, özü ilə ərindən başqa kimsənin bilmədiyi sirr çoxdan faş olub. Hələ cavan ikən Bədirin erməni qadından doğulan qızı Rayanı anası öləndən sonra Xoşbəxt öz övladı kimi böyüdüb, tərbiyə edib. Raya-Rafiənin bu sirrdən xəbərsiz olduğunu zənn edən Xoşbəxt özünü bəxtəvər ana bilir. Amma sən demə, Rafiə gəlin köçərkən Bədir qızın doğma anasının vəsiyyətinə əməl edərək, onun ilk metrikasını və anasının ağzıbağlı məktubunu ona veribmiş. Rafiə isə necə olubsa, bu sirri qızına açıb. 9 yaşlı Aylanın hər şeyi nənəsinə danışması ilə Xoşbəxtin ana dünyası, qayğısız qocalıq arzuları çiling-çiling olub.
* * *
Xoşbəxt: Əlbəttə, dəliyəm. Ağıllı olsaydım, o cür ata-ananı, yeddi igid qardaşı yerə vurub sənə qoşulub qaçardım?!
Bədir: Sən məni erməni bilirsən?
Xoşbəxt: Allah aldı ağlımı...
Bədir: İndi mən yazıq neyləyim ki, sənin ağlın qayıtsın yerinə?
Xoşbəxt: Belə canına dərd elə, Bədir, gözünə də vərəm! Götür doğma nəvəni, get qızının yanına! Mən də burda qalıb qaçqınlığımı edərəm! Bizimki də bura qədərmiş.
Bədir: Ta mənim sənə sözüm yoxdu...
Xoşbəxt: Daha nə sözün olacaq? Nə var, demisən də, eləmisən də...
Bədir: İndi deyirsən, bu yaşımızda boşanaq?
Xoşbəxt:
Bəli, boşanmalıyıq!
Bədir: Sənin ağlın başındadır?
Xoşbəxt:
Nə fərqi var başımdadır, ya yox! Onsuz da mən həmişə ürəyimlə hərəkət
edirəm. Ürəyim hara gedir, mən
də ora gedirəm. Sonra da altını çəkirəm...
- Yaxşıdır,
Şəfəq xanım,
- deyə rejissor məşqi saxlayır, - siz yenə də
Qurbana nəsə demək istəyirsiniz, amma o gözləmir, suyu da götürüb
gedir. Şəfəq xanım, siz
əyləşin, bu səhnəni Nəsibə
xanımla da keçək.
...Beləcə,
bu səhnə yenidən təkrar edilir. Bəhram Osmanov bu dəfə Nəsibə Eldarovanın Xoşbəxti
ilə Bədiri üzləşdirir. Salondan
iki aktrisanın bir obraza münasibətini
ardıcıl izləyincə
aydın olur ki, Qurban İsmayılov-Şəfəq
Əliyeva, Qurban İsmayılov-Nəsibə Eldarova
tandemi nə qədər fərqlənir...
Eyni olansa ömrün ahıl çağında
üst-üstə mənəvi
sarsıntılar keçirən
insanların ovqatının
tamaşaçıya ötürülməsidir.
Hələ məzmununu
bilmədiyim «Ünvansız
qatar» pyesi barədə düşüncələrimə
Bəhram müəllimin
növbəti göstərişi
son qoyur:
- Nəsibə
xanım, siz səhnədə qalın.
İndi Raifə ilə görüş səhnəsini
keçirik. Kəmalə hanı?
Aktrisa Kəmalə Hüseynova səhnə arxasından boylanır:
- Burdayam.
- Deməli, belə. Kəmalə, Nəsibə xanım, bu, sizin bir
aydan sonrakı görüşünüzdür... Bir ay əvvəl Xoşbəxt bilmirdi ki, Rafiə əsl anasının kim olduğunu
bilir, kənd əldən getməmişdi.
Hər şey yaxşı idi. Amma indi?.. Kəmalə xanım, bu səhnədə sənin
cəmi 4 cümləlik
sözün var. Boylana-boylana
gəlirsən. Şalından
anana oxşadırsan,
amma bayaqdan bu şala görə
neçə qadının
qabağına qaçıb
«mama» demisən, amma görmüsən ki, anan deyil... Bakıdan buracan
maşını dəli
kimi sürmüsən,
atandan, anandan, uşağından nigaransan.
Anana deyəcəyin dörd cümlədə sən bütün bunları, yorğunluğunu,
öz bioloji ananın millətindən
olanların törətdiyi
bu faciəyə görə üzrxahlığını
ifadə etməlisən!
Raifə
ağıllı qadındır,
bilir ki, Xoşbəxtin tərbiyəsi,
qayğısı nəticəsində
belə savadlı, fərasətli böyüyüb.
Onun
«mama, sənə qurban
olum», «ayaqlarının
altında ölüm»
ifadələrində bunu
çatdır. Nəsibə
xanım, sən «mama»
kəlməsini eşidib
arxaya dönürsən,
sonra qızını
tanıyıb yavaş-yavaş
irəli gəlirsən,
özün də Raifəni görən kimi bayaq dediklərinə
peşman olursan!.. Onun «mama» deməsi səni
tərk-silah edir.
Başlayın!
Hər iki aktrisa rejissorun göstərişlərini
öz hisslərinə
qatıb mizanı bir-iki dəfə təkrar edirlər.
- Xahiş edirəm, Kəmalə xanım, bir az hisslərini
cilovla. Burada isterika, qışqırmaq
lazım deyil. Sizin hər ikiniz tamaşaçının əsəblərini
qıcıqlandırmalısınız.
Tamaşaçı bu
faciəyə - köç,
yurd itkisi faciəsinə şəxsi
faciənin qarışdığını
hiss etməlidir.
* * *
...Belə bir ağır emosional səhnədən
sonra kiçik bir fasilə. Biz də gördüklərimizin
təsiri altında quruluşçu rejissordan
«Ünvansız qatar» əsəri barədə fikirlərini soruşuruq:
- Əli Əmirlinin bu pyesi üç il olar ki, teatrımızın qovluğundadır. Bu illər ərzində biz
«Ünvansız qatar»ın
səhnə variantı
üzərində axtarışlar
aparmışıq. Keçən
müddət ərzində
əsər öz aktuallığını itirməyib,
əksinə, bir az da aktuallaşıb. Söhbət konkret olaraq Qarabağ ətrafında başlayan bir prosesdən - Qərbi Azərbaycanın köklü
əhalisinin qovulmasından
bəhs etsə də, bu gün
bütün dünyada
qaçqın problemi
aktualdır. Siyasi proseslər
elə bir istiqamət alıb ki, təkcə insanların həyatı yox, ölkələr darmadağın olur, sivilizasiyalar dağılır.
Bu tamaşa Azərbaycan
dramaturqunun və teatrının dünyaya bir ismarışıdır:
insan milli mənsubiyyətindən asılı
olmayaraq, mərhəmətli
olmalıdır. İnsan
mərhəmətli olarsa,
bu gün dünyada davam edən müharibələr
baş verməzdi!
Gənc Tamaşaçılar Teatrında «Ünvansız
qatar» yola çıxıb. İlk
nümayişi 31 mart - Azərbaycanlıların
soyqırımı gününə
nəzərdə tutulan
tamaşanın quruluşçu
rəssamı Sona Qarayeva, rejissorları Gülnar Hacıyeva və Qasım İbrahimov, musiqi tərtibatçısı Tacəddin
İmanovdur. Rollarda Xalq artisti Tariyel
Qasımov, əməkdar
artistlər Qurban İsmayılov, Şəfəq
Əliyeva, Nəsibə
Eldarova, Şövqü
Hüseynov, Kəmalə
Hüseynova, Gülər
Nəbiyeva, Naibə Allahverdiyeva, Leyli Vəliyeva, aktyorlar Kərəm Hadızadə,
İradə Rəşidova,
Elşən Çarhanlı,
Zemfira Əbdülsəmədova,
Türkan Şahmarlı
və başqaları
çıxış edir.
* * *
...Sağollaşıb məşqdən çıxıram. Düşünürəm ki, ağlımkəsər yaşımda başlayan, heç şübhəsiz ki, hər birimizin taleyinə, yaşamına öz «düzəliş”lərin edən, bizimlə yanaşı yaşlanan bu problemi tarixin yaşanmış illərinə istiqamət götürən hansısa qatara yükləyib keçmişə gömmək necə yaxşı olardı! Amma hələ ki, «Ünvansız qatar»ın səhnəyə gəlişini gözləyirik.
Gülcahan
Mirməmməd
Mədəniyyət.- 2017.- 22
fevral.- S.6.