Milli Konservatoriyanın tələbəsi İtaliyada uğur qazanıb

Azərbaycan Milli Konservatoriyasının İfaçılıq (xalq çalğı alətləri - balaban) fakültəsinin birinci kurs tələbəsi Ramin Pələngov İtaliyada “Testene Art San Marino” beynəlxalq musiqi müsabiqəsinin qalibi olub.

20-dək ölkənin təmsil olunduğu müsabiqədə “Sarı gəlin” Azərbaycan xalq mahnısını və “O Sole Mio” italyan mahnısını ifa edən R.Pələngov birinci yerə layiq görülüb.

İyulun 4-də Azərbaycan Milli Konservatoriyasının rektoru, professor Siyavuş Kərimi Ramin Pələngovu təbrik edib. Bildirib ki, istedadlı tələbələrimizin beynəlxalq mükafat qazanması ölkəmiz üçün böyük nailiyyətdir.

Qeyd edək ki, müsabiqə iştirakçıları layihə çərçivəsində Florensiya və Venesiya şəhərlərində İtaliya mədəniyyəti ilə daha yaxından tanış olublar.

Mədəniyyət.- 2017.- 7 iyul.- S.2.