Romans müsabiqəsi
elan edilib
Vokal musiqinin əsas
janrlarından biri də romansdır. Bu janr ilk dəfə
orta əsrlərdə
İspaniyada poeziya növü (yerli - “roman” ləhcəsində instrumental musiqinin
müşayiəti ilə
ifa olunan lirik şeir forması) kimi yaranıb. XVIII əsrin sonlarında digər ölkələrdə
bu janr musiqinin
vokal növlərindən
biri kimi inkişaf etməyə başlayıb. Bəzi ölkələrdə
romans və mahnı eyni məna daşıyırdı.
Musiqili poetik janr olan
romansın, mahnıdan
fərqli olaraq, bədii mətni klassik poeziya növlərini ehtiva edir.
Dünya musiqi tarixində Lüdviq van Bethoven, Frans Şubert, Mixail Qlinka, Pyotr Çaykovski, Aleksandr Borodin, Sergey Raxmaninov
kimi bəstəkarlar romans janrını lirik-sentimental məzmuna malik, insani hisslərin
ən yüksək məcmusu kimi təqdim ediblər. Bu mənada romans
janrı romantizm cərəyanının mövcud
olduğu dövrlərdə
daha geniş yayılıb. XIX əsrin musiqisində aparıcı janrlardan biri məhz romans olub.
Azərbaycan professional musiqi tarixində
romans janrının
ilk yaradıcısı Asəf
Zeynallıdır. O, 1923-cü ildə Cəfər Cabbarlının "Ölkəm”
şeirinə yazdığı
romansla Azərbaycan musiqisində bu janrın əsasını
qoymaqla bərabər,
həm də romansa yeni bədii
məna gətirdi. Belə ki, ülvi məhəbbət
hisslərinin tərcümanı
kimi təqdim olunan, yalnız insan məhəbbətini tərənnüm edən
romans janrı Asəf Zeynallı yaradıcılığında vətənpərvərlik mövzularının
təmsilçisinə çevrildi.
Bəstəkarın “Sual”,
“Çadra”, “Seyran” və bu kimi
romansları ideya məzmunca bir-birinin davamı olan dəyərli incilərdir.
Azərbaycan bəstəkarlıq məktəbinin banisi dahi Üzeyir Hacıbəyli isə romans janrının yeni bir növünü
yaratdı. Bu qəzəl-romans janrıdır.
Bəstəkarın dahi
şairimiz Nizami Gəncəvinin 800 illik yubileyinə həsr etdiyi “Sənsiz” və “Sevgili canan” əsərləri qəzəl-romans janrının
ilk nümunələridir.
Sonralar bəstəkarlarımız musiqinin digər janrları ilə yanaşı romans janrına da böyük üstünlük
verərək çox
dəyərli əsərlər
yaratdılar. Ağabacı Rzayeva “Oxuma, gözəl” (sözləri
A.Puşkin), Fikrət
Əmirov “Gülüm”
(sözləri N.Gəncəvi),
Cahangir Cahangirov “Gül camalın” (N.Gəncəvi), Süleyman
Ələsgərov “Vətənimdir”
(M.Füzuli), Tofiq Quliyev “Bəxtəvər oldum” (Ə.Xaqani), Vasif Adıgözəlov “Qərənfil” (X.Natəvan)
və daha neçə-neçə bəstəkarlarımız
əsl Azərbaycan romansını yaratdılar.
Onların romansları vokal
musiqimizi inkişaf etdirməklə bərabər,
vokalçılarımızın repertuarını da zənginləşdirirdi. Bülbül,
Mobil Əhmədov, Rəhilə
Cabbarova, Sona Aslanova, Rəşid Behbudov, Firəngiz Əhmədova, Yaşar Səfərov, Şövkət
Ələkbərova, Fidan
və Xuraman Qasımovalar və digər görkəmli müğənnilərimizin repertuarında
romans janrı mühüm yer tutur.
Hazırda musiqi sənətimiz
romans janrı baxımından sanki böhran dövrünü
yaşayır. Bu barədə musiqiçilərlə
tez-tez söhbətlər
aparır və bu problemin həlli
barədə fikir mübadiləsi edirik.
Belə söhbətlərdən biri
də “Mədəniyyət”
televiziya kanalının
direktoru, Əməkdar
artist, Prezident mükafatçısı
Ramil Qasımovla oldu. Peşəkar vokal ifaçılığı
ilə Azərbaycan
opera səhnəsində Ü.Hacibəylinin
“Koroğlu” operasında
Koroğlu, R.Mustafayevin
“Vaqif”ində Vaqif, F.Əlizadənin “İntizar”
operasında Arif kimi obrazlar yaradan,
Bülbül, Mobil Əhmədov
məktəbini layiqincə
davam etdirən Ramil Qasımov həm də romanslarımızın mahir
ifaçısıdır. O da qeyd edir
ki, Azərbaycan musiqisində romans janrında çox dəyərli əsərlər
yaranıb və bu gün də
vokalçılarımız onlardan geniş istifadə edirlər: “Amma, etiraf etməliyik
ki, hal-hazırda romans janrında bir boşluq yaranıb. Nədənsə,
bəstəkarlarımız, xüsusən də, gənc bəstəkarlar bu janra az müraciət edirlər. Demək olar ki, yeni romanslar yazılmır, yazılsa da təbliğ olunmur, ictimaiyyətə çatdırılmır. Romans elə bir
janrdır ki, o, insanın daxili aləmini, onun etik və estetik
fikirlərini ifadə
etməklə insana yüksək bədii zövq aşılayır.
Bu gün məhz
belə romanslara böyük mənəvi ehtiyac var. Elə musiqimizin inkişafı üçün də bu çox gərəklidir”.
Həmsöhbətim
bildirir ki, bu problemi həll
etmək, mövcud olan boşluğu doldurmaq və romans janrını yüksək səviyyədə
təbliğ etmək
məqsədilə “Mədəniyyət”
kanalı və Azərbaycan Radiosunun təşkilatçılığı ilə bəstəkarlar arasında romans janrında müsabiqə elan edilib: “Mədəniyyət”
televiziya kanalı, Azərbaycan Radiosu, Mədəniyyət və
Turizm Nazirliyinin təşkilatçılığı ilə bir sıra
tədbirlər, layihələr
həyata keçirilib.
Elan etdiyimiz bu müsabiqədə
də əminik ki, romans janrında
Azərbaycan musiqisinə
yeni əsərlər
bəxş olunacaq.
Bütün bəstəkarlarımızın
bu müsabiqədə
fəal iştirak etmələrini arzulayırıq”.
Beləliklə, romans müsabiqəsinə
artıq start verilib.
İyun ayının 30-dək hər
bir bəstəkar öz yeni romansları
ilə bu müsabiqədə iştirak
edə bilər.
Müsabiqənin şərtlərinə gəlincə, iştirak etmək istəyənlər romans janrında yazılan əsərin notunu və rəqəmsal formatda müğənninin ifasını iyunun 30-dək medeniyyettv@aztv.az ünvanına göndərməlidir. Əsərlərdə müasirlik, ideologiya və mənəvi ruh göstərilməlidir. Yəni bədii məzmun lirik və vətənpərvərlik mövzularını əhatə edə bilər. Bəstəkarlar klassik poeziya janrları ilə bərabər gənc şairlərin də şeirlərinə müraciət edə bilərlər. Əminik ki, bu müsabiqədə həm Azərbaycan Bəstəkarlar İttifaqının üzvləri, həm də bəstəkarlıq sənətinə qədəm qoyan gənclərimiz fəal iştirak edəcəklər. Müsabiqənin qalibləri professional musiqiçilər tərəfindən müəyyən ediləcək. Əsərlər dəyərləndirildikdən sonra I, II və III yerlərin qalibi müəyyənləşəcək, qaliblərə müvafiq pul mükafatı veriləcək. Hər bir iştirakçıya uğurlar arzulayır və inanırıq ki, bu müsabiqə sayəsində musiqi sənətimizə yeni romanslar daxil olacaq.
Səadət Təhmirazqızı
Əməkdar mədəniyyət işçisi, sənətşünaslıq üzrə fəlsəfə doktoru
Mədəniyyət.- 2017.- 2 iyun.-
S.13.