“İpək
Yolu” musiqi festivalı davam edir
Şəkidə “İpək Yolu”
VIII Beynəlxalq Musiqi
Festivalı rəngarəng
konsert proqramları ilə davam edir. İyunun 29-da Şəki Dövlət
Regional Kollecində görkəmli
Azərbaycan bəstəkarı,
SSRİ Dövlət mükafatları
laureatı, Xalq artisti, professor Cövdət
Hacıyevin 100 illiyinə
həsr edilmiş konsert olub.
Konsert proqramı Azərbaycan Televiziya və Radiosunun Cahangir Cahangirov adına
Xorunun (bədii rəhbər və baş dirijor - Şəhla Ələkbərova)
çıxışı ilə
başlayıb.
Xorun ifasında Cövdət
Hacıyevin, Üzeyir
Hacıbəylinin, Müslüm
Maqomayevin əsərləri
və Azərbaycan xalq mahnıları səslənib.
Tədbirdə festivalın bədii
rəhbəri, Bəstəkarlar
İttifaqının sədri
Firəngiz Əlizadə
çıxış edərək,
Cövdət Hacıyevin
yaradıcılığı barədə danışıb.
Məlumat verilib ki, Azərbaycan Televiziya və Radiosunun Xoru 1936-cı ildə dahi bəstəkar Üzeyir Hacıbəyli tərəfindən yaradılıb.
Kollektivin ilk bədii rəhbəri
Cahangir Cahangirov olub. Xor fəaliyyət göstərdiyi
illərdə Azərbaycanın
bir çox tanınmış müğənniləri
kollektivlə əməkdaşlıq
edib. Qara Qarayev, Vasif Adıgözəlov, Ramiz Mustafayev, Emin Sabitoğlu, Şəfiqə
Axundova, Hacı Xanməmmədov, Ramiz Mirişli, Fikrət Əmirov, Firəngiz Əlizadə, Oqtay Rəcəbov, Aqşin Əlizadə və digər bəstəkarların
oratoriyaları, kantataları,
vokal-simfonik poemaları
və əsərləri
xor kollektivi tərəfindən yüksək
məharətlə ifa
olunaraq gələcək
nəsillərə ötürülüb.
Konsertdə beynəlxalq müsabiqələr laureatı Taleh Yəhyayev (bariton), Dilarə Kərimova (piano), həmçinin Şəki Dövlət Regional Kollecinin xoru və kamera ansamblı, tələbələri geniş konsert proqramı ilə çıxış ediblər.
Sonda Cövdət Hacıyevin oğlu musiqişünas İsmayıl Hacıyev tədbirin yüksək səviyyədə təşkilinə görə festivalın rəhbərliyinə minnətdarlığını bildirib.
Festivalın proqramına uyğun olaraq, iyunun 29-da axşam saatlarında İran İslam Respublikasından gəlmiş “Təbriz” rəqs qrupu konsert proqramı ilə çıxış edib.
Mədəniyyət.- 2017.- 30 iyun.-
S.2.