Ölkəmiz İordaniyada
sağlamlıq səyahəti forumunda təmsil
olunub
Azərbaycan
Sağlamlıq və Termal Turizmə Dəstək
Assosiasiyasının rəhbəri Ruslan Quliyev “Global Healthcare Travel Forum”un vitse-prezidenti
seçilib
İordaniyanın paytaxtı Amman şəhərində 25-27 fevral tarixində “Global Healthcare Travel Forum” (GHTC - Qlobal Sağlamlıq Səyahəti Forumu) zirvəsi keçirilib. 60-a yaxın ölkədən 500-dən artıq nümayəndənin qatıldığı forumda Azərbaycan Sağlamlıq və Termal Turizmə Dəstək Assosiasiyasının (AHTTSA) prezidenti Ruslan Quliyev də iştirak edib.
Məlumat üçün qeyd edək ki, Azərbaycan 2013-cü ildən bu qurumda təmsil olunur, 2014-cü ildən isə təşkilatın idarə heyətində fəaliyyət göstərir. Təşkilatın ilk prezidenti Türkiyə Sağlıq Turizmi Şurası başqanı Emin Çakmak olub. O, hazırda qurumun fəxri prezidentidir. Təşkilatın indiki prezidenti İordaniya Özəl Xəstəxanalar Assosiasiyasının sədri Dr. Feyzi Al-Hammoridir.
Zirvə toplantısının açılış mərasimində İordaniya Krallığının baş naziri Hani Al-Mulki, digər yüksək vəzifəli şəxslər, turizm naziri xanım Lina Mazhar Annab iştirak edib. Açılışdan sonra forum iki gün stend nümayişləri, panel və B2B görüşlər formatında davam etdirilib.
AHTTSA “Global Healthcare Travel Concil” stendində təmsil olunub. Ziyarətçi və iştirakçılara
Azərbaycan sağlamlıq
turizmi potensialı (Abşeron, Naftalan, Qalaaltı, Duzdağ, Qəbələ, İstisu
və s.) haqda geniş məlumat verilib, turizm potensialını əks etdirən çap və elektron reklam-təbliğat materialları
paylanılıb.
Baş nazir Hani Al-Mulki,
İordaniya Krallığının
şahzadələri xanım
Ghida Talal və Dina Mired stendi ziyarət ediblər.
Ümumilikdə 7 panel görüşməsi təşkil olunub. Müzakirə olunan aktual mövzular içərisində sağlamlıq
turizminə qlobal baxış, qlobal sağlamlıq turizmi destinasiyaları, leqallaşma,
tənzimləmə və
akkreditasiya, təhsil və tədqiqat, sağlamlıq turizmində
ölkələrarası əməkdaşlıq,
brendinq və marketinq strategiyaları, tibbi turizm, dental turizm, spa və velnes turizmi, kulinariya turizmi və s. istiqamətlərin
maraq kəsb etdiyi vurğulanıb və yeni tendensiyaların
şaxəli inkişafı
hədəf kimi qəbul olunub.
Forum çərçivəsində
Azərbaycan və Türkiyə heyəti ölkəmizin İordaniyadakı
səfirliyində Xocalı
soyqırımını anma
mərasiminə də
qatılıb.
Forumun son günü GHTC Baş Assambleyasının
qapalı toplantısı
və idarə heyətinə seçkilər
keçirilib. Türkiyə Sağlıq Turizmi Şurasının təşəbbüsü
və dəstəyi ilə Azərbaycan Sağlamlıq və Termal Turizmə Dəstək Assosiasiyasının
prezidenti Ruslan Quliyev təşkilatın
vitse-prezidenti seçilib
və iştirakçılara
Azərbaycan haqqında
geniş məlumat verilib. Təşkilatın yeni prezidenti
Birləşmiş Ərəb
Əmirliklərini təmsil
edən “Medical Tourism Council”in
sədri xanım Leyla Marzouqi olub.
Sonda “Qlobal sağlıq
turizmi Əmman bəyannaməsi” qəbul
olunub.
F.Hüseynov
Mədəniyyət.- 2017.- 3 mart.-
S.9.