“Arşın mal alan” özbək dilində yeni quruluşda təqdim olunub

 

 

 

   Daşkənddəki Mukimi adına Özbəkistan Dövlət Musiqili Teatrında dahi Azərbaycan bəstəkarı Üzeyir Hacıbəylinin “Arşın mal alanmusiqili komediyasının özbək dilində yeni quruluşda ilk tamaşası olub.

   Premyera axşamında Daşkənddəki səfirliyimizin, Heydər Əliyev adına Azərbaycan Mədəniyyət Mərkəzinin əməkdaşları, Özbəkistanın mədəniyyət və incəsənət xadimləri, Azərbaycan diasporunun üzvləri iştirak ediblər.

   Tamaşaya teatrın rejissoru, Əməkdar incəsənət xadimi Əhəd Farmonov quruluş verib. Rolları Aman Yuldaşev, Dilarom Abdualimova, Nargiza Şaxobova, Musallam Dadajonova, Baxram Baltoev, Marifat Artikova və başqaları ifa ediblər.

   “Arşın mal alan” operettası Daşkənddə ilk dəfə hələ 1919-cu ildə “Kolizey” teatrında tamaşaya qoyulub. Həmin il Bakıdan gələn rejissor Mirzə Həbib Axundzadə Səmərqənddə yaşayan azərbaycanlılardan ibarət teatr truppası yaradıb və əsər bu qədim şəhərdə də səhnələşdirilib.

   Musiqili komediya 1921-ci ildə Buxarada tamaşaya qoyulub. 1922-ci ildə isə Daşkəndin “Raxat bağçası” teatrında Sidqi Ruhullanın rəhbərliyi ilə Azərbaycandan gələn aktyorlar bu əsərə səhnə həyatı veriblər. Sonrakı illərdə “Arşın mal alan” dəfələrlə Daşkənd, Fərqanə, Buxara, Kokand, Xarəzm, Səmərqənd şəhərlərində tamaşaçılara təqdim edilib.

   Üzeyir Hacıbəylinin bu ölməz əsəri 100 ildən artıqdır ki, Orta Asiyada ən məşhur tamaşa kimi səhnədən düşmür, teatrlar zaman-zaman bu əsərə müraciət edirlər. Bir neçə il əvvəl isə Daşkənddəki Operetta Teatrı “Arşın mal alan”ı rus dilində tamaşaya hazırlayıb.

 

Mədəniyyət.- 2017.- 1 noyabr.- S.16.