Bakıda “M.A.P.” incəsənət
festivalı keçirilib
Noyabrın 1-dən 6-dək Bakıda
“YARAT” Müasir İncəsənət
Mərkəzinin təşəbbüsü,
“Bakcell” şirkətinin
dəstəyi ilə
“M.A.P.” (Music. Art. Performance)
incəsənət festivalı
keçirilib. Layihə çərçivəsində
paytaxtın müxtəlif
teatr səhnələrində
tamaşalar təqdim olunub, həmçinin konsert, mühazirə və ustad dərsləri
təşkil edilib.
Festival proqramına
daxil olan əsərlərdən biri
- “Pyotr Fomenkonun emalatxanası” teatrının
təqdim etdiyi “Gülməli adam”
tamaşası “ÜNS” yaradıcılıq
səhnəsində nümayiş
olunub.
Əvvəlcə teatrın bədii
rəhbəri, Rusiyanın
Əməkdar incəsənət
xadimi, Rusiya Teatr Sənəti İnstitutunun professoru Yevgeni Kamenkoviç çıxış edərək
Bakıya dəvətə
görə festivalın
təşkilatçılarına minnətdarlığını bildirib.
Fyodor Dostoyevskinin
“Gülməli adamın
yuxusu” adlı fantastik hekayəsi əsasında quruluş verilmiş “Gülməli adam” tamaşası
gənc artist Fyodor Malışevin
və “Besı” musiqi qrupunun birgə işidir. Fyodor Malışev ssenari müəllifi və baş rolun ifaçısı olmaqla yanaşı, bu tamaşada rejissor debütünü də edib.
Müəllif böyük yazıçının
məşhur hekayəsini
yeni tərzdə mənalandıraraq onu 45 dəqiqəlik monoloqu və xüsusi musiqi müşayiəti olan monotamaşaya çevirib. Musiqi heyrətamiz
qəhrəmanın bir-birini
ani əvəz edən emosiyalarına uyğundur. Tamaşanın
fəlsəfi ideyası
Xristianlıq dininin on
əsas ehkamlarından
biridir: “Yaxın adamlarını özünü
sevdiyin kimi sev”. Bu adi həqiqət gülməli
insana yuxuda ikən açılır.
O özünü öldürərək
müqəddəs torpağa
düşür. Cənnətə oxşayan bu məkanda insanlar əzab-əziyyətin nə
olduğunu hələ
bilmir, onlar hamısı doğulandan ölənə qədər
xoşbəxtdirlər, lakin
bu qonağın “sayəsində” müasir dünyanın naqislikləri
onlara da yoluxur. Çünki yaşadığı torpaqda xoşbəxtliyi “söndürən”, cəmiyyəti
ləkələyən, onu
özünün istədiyi
kimi yaşamağa öyrədən məhz insandır. “Özünü necə sevirsənsə, başqalarını
da elə sev. Vəssalam, bundan artıq
heç nə lazım deyil” - indi son dərəcə adi olan bu
sözlər həmişəkindən
daha aktual səslənir. Gülməli adamın sözləri müasir dövrün ağrı-acılarını əks
etdirir. Əgər biz hamımız bu həqiqəti qəbul etsəydik, onda nə müharibələr
olardı, nə də terror.
Tamaşa zalın alqışları
ilə qarşılanıb.
* * *
Festivalın proqramına məşhur
birpərdəli baletlər
də daxil idi. Layihənin son günü - noyabrın
6-da Azərbaycan Dövlət
Akademik Opera və Balet Teatrında Rusiyanın “Novıy Balet” teatrı baletmeyster Konstantin Keyxelin quruluşunda “Sovrulanlar”, Kiril Radevin quruluşunda
“Çevrilmə” (F.Kafkanın
əsərinin motivləri
əsasında) və
Françesko Ventrilyanın
quruluşunda “Bolero” baletlərini
təqdim edib.
“Sovrulanlar”
baleti küləyin magiyası haqqındadır.
Bütün zamanlarda insanlar
küləyə ilahi
qüvvə kimi yanaşıblar. Bir çox
rəvayətlərdə külək
ayrı-ayrı tanrıların
obrazlarında çıxış
edir.
“Çevrilmə”
baleti səhnədə
baş qəhrəmanın
yaşadığı anlaşılmaz,
dramatik alın yazısı ilə bağlı fantastik ab-hava yaradıb. Bu səhnə əsəri
həqiqət və cəfəngiyat arasında
incə sədd dramanı qroteskə çevirməklə tamaşaçını
qeyri-reallıq və fantasmaqoriya dünyasına
aparır, insan taleyi haqqında düşünmək üçün
əsas verir.
Moris Ravelin “Bolero” baleti
taleyin əzablı yolları ilə mübarizədə insanın
gücünü təsvir
edir. “Bolero”nun
hər bir notu, balet artistlərinə
bu ecazkar musiqinin duyğularını
və qüdrətini
ötürməyə vadar
edir. Taleyin dönüklüyü ilə insanın mübarizəsi sonda zəfər çalan sevginin timsalında kulminasiya nöqtəsinə
çatır, qüvvə
və ehtirasın bir-birinə qovuşması
ilə tamamlanır.
* * *
Festival çərçivəsində “YARAT” Müasir İncəsənət
Mərkəzində tanınmış
musiqiçilər Bencamin
Britten və Sofiya Qubaydulina konsert proqramı ilə çıxış edib.
Bencamin
Britten “Frenk Bric mövzusunda variasiyalar” və Sofiya Qubaydulina isə “Fachwerk” adlı ən məşhur kompozisiyalarını səsləndirib.
Musiqili
gecədə, həmçinin Ukrayna əsilli
almaniyalı akkordeon ifaçısı Roman Yusipey
çıxış edib.
İfaçıları Xalq artisti Yalçın Adıgözəlovun idarəsi
ilə Qara Qarayev
adına Azərbaycan Dövlət Kamera Orkestri müşayiət edib.
Mədəniyyət.- 2017.- 8
noyabr.- S.6.