Bakıda ikinci Şopinq
festivalı başa çatdı
Oktyabrın 15-dən noyabrın 15-dək davam edən II Bakı Şopinq Festivalı uğurla başa çatıb.
Paytaxtımızda Şopinq
festivalı Prezident İlham Əliyevin
2016-cı il 1 sentyabr tarixli “Azərbaycan Respublikasında turizmin inkişafı ilə bağlı əlavə tədbirlər haqqında”
sərəncamına əsasən,
eləcə də ölkə başçısının
2016-cı il 6 dekabr tarixli fərmanı ilə təsdiq edilmiş “Azərbaycan Respublikasında ixtisaslaşmış
turizm sənayesinin inkişafına dair Strateji Yol Xəritəsi”nə
uyğun olaraq keçirilir.
Festivalın keçirilməsi Mədəniyyət və
Turizm Nazirliyinə həvalə edilib. Təşkilati məsələləri nazirliyin nəzdində fəaliyyət göstərən
Azərbaycan Konqreslər
Bürosu müvafiq qurumlarla birlikdə həyata keçirir.
Birincisi bu ilin 10 aprel - 10 may tarixlərində gerçəkləşən
festival cəlbedici təkliflər
və təbliğat vasitəsilə ölkəyə
gələn turistlərin
sayını artırmaq,
turizm, mehmanxana xidməti, ticarət, nəqliyyat və digər sahələrin inkişafına təkan vermək məqsədi daşıyır.
İkinci festivalda bir
ay müddətində müştərilər
dünya brendlərinə
məxsus geyim, elektronika, məişət
texnikası, mebel, ətriyyat və kosmetikanı, eləcə
də digər məhsulları Bakıda yerləşən 500-dən çox
mağazadan xüsusi kampaniya və endirimlərlə əldə
ediblər. Bununla yanaşı,
“Baku Shopping Festival - Tax Free” nişanı olan mağazalarda 100 AZN-dən çox alış-veriş edən
həm yerli, həm də xarici vətəndaşlar
aldıqları məhsulların
əlavə dəyər
vergisinin (ƏDV) müəyyən
qismini geri alıblar.
Festivalda paytaxtımızda yerləşən və üzərində Bakı
Şopinq Festivalının
loqosu olan bütün mağazalar, və digər obyektlər festivalda iştirak edib. Festivalda mağazalarda endirimlər, həmçinin
bir dəfəyə
100 manatdan artıq hər alış-veriş
edənlər üçün
“Festival sürprizləri” lotereya
kampaniyası təşkil
olunub.
Azərbaycan Konqreslər Bürosu
tərəfindən festivala
qoşulan mağazalardan
alış-veriş edənlər
üçün təşkil
edilən lotereyanın
növbəti qaliblərinin
adı açıqlanıb.
Kampaniya müddətində
lotereya iştirakçılarına
“Metro Park” alış-veriş mərkəzidən 20 televizor,
“Park Bulvar”dan 20 kamera,
“Bravo” hipermarketdən 20 mobil
telefon, “Baku Electronics”dən
20 tozsoran, “Optimal Electronics”dən
20 soba hədiyyə qazanmaq
şansı verilib.
Festivalın nəticələri
ilə bağlı ətraflı məlumatlar müvafiq
sorğular aparıldıqdan sonra ictimaiyyətə çatdırılacaq.
Mədəniyyət.- 2017.- 17
noyabr.- S.9.