Yubiley münasibətilə kitab sərgisi

Noyabrın 16-da M.F.Axundzadə adına Milli Kitabxananın sərgi zalında yazıçı-publisist Əli İldırımoğlunun 90 illik yubileyi münasibətilə kitab sərgisi açılıb. Tədbiri kitabxananın direktoru, professor Kərim Tahirov açaraq Əli İldırımoğlunun yaradıcılığına nəzər salıb. Bildirib ki, yazıçı doqquz romanın, yüzlərlə povest, hekayə, oçerk, felyeton və publisistik yazıların müəllifidir. Onun 12 cildlik “Seçilmiş əsərləri” işıq üzü görüb. O, bu gün də qələmi əlindən yerə qoymur, yazıb-yaradır.

Ə.İldırımoğlunun 1975-ci ildə çap olunan “Mayaklar” adlı ilk kitabını tədbir iştirakçılarına təqdim edən K.Tahirov iti qələmli ədibin əsərlərinin hər zaman oxucular tərəfindən maraqla qarşılandığını vurğulayıb.

Daha sonra tədbir iştirakçıları sərgi ilə tanış olublar. Sərgidə yazıçının Azərbaycan, türk, ingilis, rus və digər dillərdə çap olunan əsərləri, haqqında yazılan kitablar, çoxlu sayda qəzet-jurnal materialları yer alıb.

Lalə

Mədəniyyət.- 2017.-22 noyabr.- S.6.