Vaqif Mustafazadə haqqında sənədli
film Gürcüstanda
təqdim edilib
Azərbaycanın dünya şöhrətli
cazmeni Vaqif Mustafazadə haqqında sənədli filmin gürcü dilində variantı “BP-Azerbaijan” şirkəti
tərəfindən Tbilisidə
ictimaiyyətə təqdim
edilib. Şirkətdən verilən məlumatda
“Mənim tanıdığım
Vaqif” filminin daha əvvəl Bakıda Azərbaycan dilində böyük uğurla təqdim edildiyi diqqətə çatdırılır.
Vaqif Mustafazadə həyatının
müəyyən bir hissəsini Tbilisidə yaşayıb və onun gürcü dostları da təqdimat mərasimində
iştirak ediblər.
V.Mustafazadənin yaxın
dostu olmuş musiqiçi Dmitri Qonqliaşvili
filmdən mütəəssir
olaraq deyib: “Vaqif haqqında nə deyə bilərəm - o, bir dahi idi”.
Tədbirdə
iştirak etmiş Gürcüstanın mədəniyyət
naziri Mixeil Giorqadze bildirib: “Vaqif Mustafazadə o musiqiçilərdəndir ki,
onun istedadı və irsi eyni
dərəcədə hər
iki ölkəyə məxsusdur. Musiqiçilər, xüsusən də
caz sevərlər onu Azərbaycan caz-muğamının banisi
olan dahi bir pianoçu və bəstəkar kimi tanıyırlar.
Əslində isə Vaqif
Mustafazadə gələcəyə
yönələn və
çox maraqlı Şərq cazı məktəbini yaradıb”.
BP-nin Azərbaycan, Gürcüstan
və Türkiyə üzrə regional prezidenti
Qəri Couns isə deyib: “Biz Azərbaycan cazının
ən tanınmış
nümayəndəsi olan
Vaqif Mustafazadənin adı ilə bağlılığımızdan qürur duyuruq. O həm də dünyanın ən məşhur caz pianoçularından və
bəstəkarlarından biridir.
Onun istedadının pərəstişkarı
kimi bilirəm ki, o, Şərq və Qərb musiqisinin ən yaxşı janrlarının
fantastik sintezini yaratmağa nail olub”.
“BUTA film” şirkəti tərəfindən çəkilmiş
sənədli film Vaqif
Mustafazadənin müasirləri olan Rusiya, Gürcüstan, Estoniya, Polşa və
ABŞ caz ustalarının onun yaradıcılıq irsinə və şəxsiyyətinə
sevgi və rəğbət dolu xatirələri üzərində qurulub.
Mədəniyyət.- 2017.- 29
noyabr.- S.2.