Almanların Qafqaza gəlişinin 200 illiyi UNESCO-da qeyd olunub

 

 

 

   Noyabrın 23-də UNESCO-nun Parisdəki baş qərargahında Azərbaycan Respublikasının Mədəniyyət və Turizm Nazirliyi və ölkəmizin UNESCO yanında daimi nümayəndəliyinin təşkilatçılığı, GürcüstanAlmaniya nümayəndələrinin iştirakı ilə almanların Cənubi Qafqaza gəlişinin 200 illiyi münasibətilə böyük konsert proqramı keçirilib.

   Azərbaycanın Fransadakı səfiri Rəhman Mustafayev, müxtəlif ölkələrin UNESCO yanındakı səfirləri, tanınmış incəsənət və mədəniyyət xadimləri, ictimaiyyət nümayəndələri tədbirdə iştirak ediblər.

   Əvvəlcə ölkəmizin UNESCO yanında daimi nümayəndəliyinin rəhbəri, səfir Anar Kərimov çıxış edib. O, yubiley mərasimində Azərbaycan, GürcüstanAlmaniyadan gəlmiş musiqiçilərin bu ölkələrin ənənəvi və klassik musiqilərini səsləndirəcəklərini qeyd edib. Bildirilib ki, konsertdə Azərbaycan muğamı ilə yanaşı, gürcü polifonik mahnısı və İ.S.Baxın klassik əsərləri ifa olunacaq. Daimi nümayəndə qeyd edib ki, Azərbaycan muğamı və gürcü polifonik mahnısı UNESCO-nun Bəşəriyyətin qeyri-maddi mədəni irs üzrə reprezentativ siyahısına daxil edilib.

   Konsertin almanların Cənubi Qafqaza, o cümlədən Azərbaycana miqrasiyasının 200 illiyinə həsr edildiyini vurğulayan A.Kərimov onların ölkəmizdəki zəngin tarixi və mədəni irsindən söz açıb, iştirakçıları bu zəngin irslə tanış olmaq üçün ölkəmizə, eləcə də UNESCO-nun baş qərargahında keçirilən sərgiyə baxmağa dəvət edib. Diplomat qısa zaman kəsiyində almanların yerli əhaliyə asanlıqla inteqrasiyasının xalqımızın istiqanlılığı, digər mədəniyyətlərə hörməti sayəsində mümkün olduğunu vurğulayıb. Bildirilib ki, Azərbaycanda müxtəlif xalqların və dinlərin nümayəndələri mehriban ailə kimi yaşayırlar. Tolerantlıq xalqımızın gündəlik həyat tərzidir. Qeyd edilib ki, Azərbaycan hökuməti bütün etnikdini icmaların tarixi və mədəni irsinin qorunub saxlanmasına, bərpasına xüsusi diqqət ayırır.

   Mərasimdə çıxış edən mədəniyyət və turizm naziri Əbülfəs Qarayev tədbirə verdikləri dəstəyə görə UNESCO rəhbərliyinə və katibliyinə təşəkkürünü bildirib. Nazir tədbirin Azərbaycanda hökm sürən multikulturalizmindini tolerantlığın bir nümunəsi olduğunu qeyd edib. Ə.Qarayev Azərbaycanda mövcud olmuş tarixi alman məskənləri, onların qorunub saxlanması üçün görülən işlər, həmin ərazilərdəki abidələrin ölkəmizin turizm imkanlarına töhfəsi barədə məlumat verib. Nazir həmçinin Azərbaycanda alman məskənlərinin salınmasının 200 illiyi münasibətilə Prezident İlham Əliyev tərəfindən imzalanmış sərəncama müvafiq olaraq hazırlanmış tədbirlər haqqında da danışıb.

   Azərbaycanın mədəniyyətlər və dinlər arasında dialoqun möhkəmlənməsi üçün gördüyü işlərdən söz açan Əbülfəs Qarayev multikultural yaxınlaşma və digər mədəniyyətləri daha yaxından tanıma nəticəsində dünyadakı bir çox problemlərin asanlıqla həll oluna biləcəyini qeyd edib. “Bakı Prosesi”nə toxunan nazir Bakıda keçirilən Dünya Mədəniyyətlərarası Dialoq Forumunda UNESCO-nun ölkəmizin əsas tərəfdaşı olmasından fəxr etdiklərini vurğulayıb.

   Nazir “Bakı Prosesinin 10 illiyinin qeyd edilməsi ilə bağlı Prezident İlham Əliyev tərəfindən sərəncam imzalandığını diqqətə çatdırıb.

   UNESCO-nun baş direktorunun xarici əlaqələr və ictimai informasiya üzrə köməkçisi Erik Falt, Gürcüstanın UNESCO yanındakı nümayəndəliyinin rəhbəri Ekaterina Siradze-Dölone, Almaniyanın qurumdakı nümayəndəliyinin rəhbəri Stefan Kravyelski çıxış edərək ölkəmizdəki tolerant mühitdən, Azərbaycanın mədəniyyətlərarası dialoqa töhfəsindən danışıblar.

   Çıxışlardan sonra tarixçi, Azərbaycanın tanıtımı ilə bağlı televiziya layihələrinin müəllifi Fuad Axundov XIX əsrdə almanların ölkəmizdə məskunlaşması tarixi ilə bağlı məlumat verib. Azərbaycanda almanların yaşadıqları məkanlar, onların həyat tərzi ilə bağlı sənədli film nümayiş etdirilib.

   Daha sonra konsert proqramı təqdim olunub.

   Sonda tədbir iştirakçıları almanların Cənubi Qafqaza gəlişinin 200 illiyi münasibətilə təşkil edilmiş sərgiyə baxıblar.

 

 

Mədəniyyət.- 2017.- 29 noyabr.- S.8.