“Azərbaycan - xalçanın qəlbi”

“Euronews” telekanalı ölkəmizlə bağlı “Azərbaycan. Xalçanın qəlbi” adlı süjet yayımlayıb. Süjetdə vurğulanır ki, xalçaçılığın ölkəmizdə çox qədim və zəngin tarixi var.

Bildirilir ki, dünyada ilk Xalça muzeyi Azərbaycanda yaradılıb. Muzeyin orijinal üslubda - yığılmış xalça formasında yeni binası haqqında ətraflı məlumat verilir.

Müəllif diqqətə çatdırır ki, muzeydə 5 minə yaxın eksponat var. Zallarda xalçaların təbii rənglərinə xələl gəlməsin deyə, lazımi hərarət və işıq səviyyəsi həmişə qorunur.

Muzeyin tərtibatının çox maraqlı olduğunu deyən müəllif qeyd edir ki, ziyarətçi sanki tədricən bu sənətin sirlərinin açıldığı, onu yaradan xalqın və daha əvvəlki nəsillərin mənəvi dünyasını özündə birləşdirən başqa bir aləmə düşür. “Euronews”un hazırladığı süjetdə o da qeyd edilir ki, 2010-cu ildə UNESCO-nun qeyri-maddi mədəni irs siyahısına daxil edilən Azərbaycan xalçaları Ermitaj Muzeyində (Sankt-Peterburq), Vatikanda da qorunub saxlanılır.

Mədəniyyət.- 2017.- 20 oktyabr.- S.6.