“Musiqinin Məcnunu” filminin təqdimatı keçirildi

Oktyabrın 26-da Azərbaycan Musiqi Mədəniyyəti Dövlət Muzeyində qədim musiqi alətlərinin tədqiqatçısı və bərpaçısı, sənətşünaslıq doktoru, professor, Xalq artisti Məcnun Kərimin xatirəsinə həsr olunmuş “Musiqinin Məcnunu” sənədli filminin təqdimatı keçirildi.

Tədbiri muzeyin direktoru, Əməkdar mədəniyyət işçisi Alla Bayramova açaraq görkəmli alimin fəaliyyətindən danışdı. Qeyd etdi ki, musiqimizin təəssübkeşi olan Məcnun Kərim uzun illər qədim musiqi alətlərimizlə bağlı tədqiqatlar aparıb. Alim rud, bərbət, çanq, Şirvan tamburu, santur kimi alətləri bərpa edib, daha sonra Azərbaycan Musiqi Mədəniyyəti Dövlət Muzeyi nəzdində Qədim musiqi alətləri ansamblının əsasını qoyub.

Bildirildi ki, M.Kərimin bərpa etdiyi 24 musiqi aləti hazırda muzeydə saxlanılır. Bu musiqi alətləri dəfələrlə xarici ölkələrdə nümayiş etdirilib. Dörd dildə nəşr olunmuş “Azərbaycanın musiqi alətləri” kitabının müəllifi olan sənətkar Üzeyir Hacıbəyli adına Bakı Musiqi Akademiyası nəzdində “Qədim musiqi alətlərinin bərpası və təkmilləşdirilməsi” laboratoriyasına rəhbərlik edib, alətşünaslıq fənninin əsasını qoyub.

Mədəniyyət və Turizm Nazirliyinin Mədəniyyət müəssisələri və xalq yaradıcılığı şöbəsinin müdiri Fikrət Babayev, muzeyin şöbə müdiri Təranə Zeynalova, filologiya üzrə fəlsəfə doktoru Şövkət Hüseynova və başqaları görkəmli sənətşünas alimin musiqi mədəniyyətimizin inkişafına verdiyi töhfələrdən danışdılar.

Sonda Məcnun Kərimin yaradıcısı olduğu Qədim musiqi alətləri ansamblının ifasında musiqi proqramı təqdim olundu.

Savalan

Mədəniyyət.- 2017.- 27 oktyabr.- S.2.