Vyanada müasir
Azərbaycan incəsənəti haqqında mühazirə
Gənc rəssam Fərhad Fərzəli Vyana Tətbiqi İncəsənət Universitetində “Azərbaycanda müasir incəsənət səhnəsi” mövzusunda mühazirə ilə çıxış edib. Yanvarın 18-də keçirilən tədbirdə XX və XXI əsrlərdə Azərbaycanda müasir incəsənət sahəsində əsas istiqamət və cərəyanlar, rəssamlar və onların müraciət etdikləri mövzulardan bəhs edilib. Qeyd olunub ki, Sovet İttifaqının süqutu ilə incəsənətdə sosialist realizmi dövrü də öz ömrünü başa vurub. Ondan sonra Azərbaycanda müasir sənət məkanında yeni axtarışlara və təsvir texnikalarının tətbiqinə başlanılıb.
Mühazirədə Faiq Əhməd, Orxan Hüseyn, Sitarə İbrahimova, Babi Bədəlov, Nəzrin Məmmədova və digər rəssamların müxtəlif əsərləri əsasında onların üslubu, müraciət etdikləri mövzu dairəsi, tətbiq etdikləri texnika və digər qrafik, həmçinin multimedial ifadə vasitələri ətraflı izah olunub.
Tədbirdə Vyana Tətbiqi İncəsənət Universitetinin vitse-rektoru Barbara Putz-Plecko, Avstriyadakı Azərbaycan Mədəniyyət Mərkəzinin nümayəndələri, Vyana Tətbiqi İncəsənət Universitetinin və Avstriya Rəssamlıq Akademiyasının müəllim və tələbələri, müasir incəsənətlə maraqlanan şəxslər və soydaşlarımız iştirak ediblər.
Çıxışdan sonra F.Fərzəli Azərbaycanda müasir incəsənətin hazırkı vəziyyəti və yaradıcılıq meyillərinə dair sualları cavablandırıb.
Avropada
ilk incəsənət məktəbi olan Vyana Tətbiqi İncəsənət
Universiteti 1867-ci ildə yaradılıb. Hər
il bu təhsil müəssisəsinə
müxtəlif ölkələrdən 2 minə yaxın tələbə
qəbul olunur. Fərhad Fərzəli
2012-ci ildə sözügedən universitetdə təcrübə
keçib. Rəssam 2011-ci ildə Vyanada Avstriyanın Elm, Təhsil
və Mədəniyyət Nazirliyi tərəfindən
təşkil edilmiş “Artist-in-residence”
proqramında iştirak edib.
Mədəniyyət.- 2017.- 25
yanvar.- S.6.