Folklorşünas, ədəbiyyatşünas, tərcüməçi

Qəzənfər Paşayevin tərtib etdiyi kitabın və alim haqqında Milli Kitabxananın hazırladığı biblioqrafiyanın təqdimatı keçirildi

İyulun 4-də Milli Kitabxanada professor Qəzənfər Paşayevin tərtibçisi olduğu “İmadəddin Nəsimi. İraq divanı”nın latın qrafikalı əlifba ilə nəşrinin və kitabxana tərəfindən hazırlanan “Qəzənfər Paşayev. Biblioqrafiya” kitabının təqdimat mərasimi keçirildi.

Mədəniyyət Nazirliyi və Milli Kitabxananın birgə təşkilatçılığı ilə reallaşan tədbirdə iştirakçılar əvvəlcə görkəmli ədəbiyyatşünas alimin əsərlərindən ibarət sərgi ilə tanış oldular.

Tədbiri kitabxananın direktoru, professor Kərim Tahirov açaraq Qəzənfər Paşayevin elmi və bədii yaradıcılığından söz açdı. Bildirdi ki, Qəzənfər müəllimin hər bir yazısı, yeni kitabı ədəbiyyatda hadisəyə çevrilir, sevilərək oxunur.

Qeyd olundu ki, biblioqrafiya ədəbiyyatşünas alimin 80 illik yubileyinə həsr edilib. Göstərici onun həyat və yaradıcılığının yarım əsrdən artıq bir mərhələsini (1966-2017-ci illər) əhatə edir. Biblioqrafiyada tədqiqatçının Azərbaycan, ingilis, rus, türk və ərəb dillərində çap olunmuş monoqrafiya və kitabları, tərcümə əsərləri, dövri mətbuatda dərc olunmuş elmi və publisistik məqalələri, rəy verdiyi elmi əsərlər öz əksini tapıb.

Bildirildi ki, alimin tərtib etdiyi “İmadəddin Nəsimi. İraq divanı” kitabı latın qrafikalı əlifba ilə ilk dəfə çap olunur. Nəşr ölkənin kitabxanalarına, təhsil-tədris və elm ocaqlarına, gənclər mərkəzlərinə paylanılacaq.

AMEA-nın vitse-prezidenti, Nizami adına Ədəbiyyat İnstitutunun direktoru, akademik İsa Həbibbəyli çıxış edərək Qəzənfər Paşayevin elmi fəaliyyətindən, Nəsimi irsinin öyrənilməsinə verdiyi töhfələrdən danışdı. Vurğuladı ki, alim əsərlərində Kərkük ədəbiyyatını Azərbaycanın ayrılmaz tərkib hissəsi kimi verib, ölkəmizdə kərkükşünaslığın əsaslarını yaradıb: “Qəzənfər Paşayev müraciət etdiyi problemlərə, ədəbi-tarixi şəxsiyyətlərə epoxanın gözü ilə baxmağı bacaran, qələmə aldığı məsələləri yüksək vətəndaşlıq səviyyəsində təqdim etmək vəzifəsini məsuliyyətlə həyata keçirən əsl elm adamıdır. Onun yeddicildlik seçilmiş əsərlərində xüsusi yer tutan “İraq-türkman folkloru” monoqrafik tədqiqatı ölümsüz tarixə sahib olan Kərkük elatının milli ruhunun ifadəsi kimi yaranmış folklorun toplanıb tədqiq edilməsinə həsr edilmiş şah əsərdir”.

Diqqətə çatdırıldı ki, Qəzənfər Paşayev ilk dəfə “Nəsimi divanının İraq nüsxəsi”ni aşkara çıxararaq nəşr etdirib. Onun İraq-türkmən şairi Əbdüllətif Bəndəroğlu ilə dostluğu Azərbaycan-İraq əlaqələri tarixində böyük körpü olub.

Milli Məclisin deputatı Qənirə Paşayeva çıxışında yeni nəşrlərin Azərbaycan ədəbiyyatına və elminə böyük töhfə olduğunu vurğuladı, kitabların ərsəyə gəlməsində əməyi olanlara minnətdarlığını bildirdi.

Nizami adına Ədəbiyyat İnstitutunun şöbə müdiri, professor Şirindil Alışanlı, Azərbaycan Aşıqlar Birliyinin sədri, professor Məhərrəm Qasımlı, şair-publisist Vaqif Bəhmənli, professor Rəhim Əliyev, “Azərsun Holdinq”in İdarə heyətinin üzvü Tahir Gözəl və başqaları çıxış edərək Qəzənfər Paşayevin elmimizin və ictimai fikrimizin inkişafındakı rolundan danışdılar.

“İmadəddin Nəsimi. İraq divanı”nın latın qrafikalı əlifba ilə nəşrinin nəsimişünaslıq elminə böyük töhfə olduğu, Nəsiminin bir daha Azərbaycan ədəbiyyatına məxsus olduğunu sübut etdiyi qeyd edildi. Vurğulandı ki, alimin folklorşünaslıq, ədəbiyyatşünaslıq, tərcüməçilik fəaliyyəti ayrılıqda geniş bir tədqiqat mövzusudur, onun hər bir əsəri gərgin elmi zəhmətin bəhrəsidir.

Sonda Qəzənfər Paşayev çıxış edərək tədbirin təşkilatçılarına və iştirakçılarına, kitabların ərsəyə gəlməsində zəhmət çəkən hər kəsə təşəkkürünü bildirdi.

Tədbirdə həmçinin Şamaxıdan gəlmiş qiraət ustası Hacı Fərəc Əliyevin ifasında Nəsiminin qəzəllərindən nümunələr səsləndirildi.

Lalə Azəri

Mədəniyyətş- 2018.- 6 iyul.- S. 4.