Əlimərdan bəy Topçubaşovun kitablarının təqdimatı

Əsərlər Cümhuriyyət dövrünün öyrənilməsi baxımından əhəmiyyət kəsb edir

İyulun 3-də Azərbaycan Milli Elmlər Akademiyasının (AMEA) Mərkəzi Elmi Kitabxanasında görkəmli siyasi xadim Əlimərdan bəy Topçubaşovun “Doğma Azərbaycanın mənafeyini qoruyacağıq” və “Qafqaz Azərbaycanı nümayəndə heyətinin Sülh Konfransından tələbləri” kitablarının təqdimat mərasimi keçirilib.

AMEA-nın vitse-prezidenti, akademik İsa Həbibbəyli tədbirin Prezident İlham Əliyevin Azərbaycan Xalq Cümhuriyyətinin (AXC) 100 illik yubileyi ilə bağlı sərəncamına əsasən təşkil edildiyini diqqətə çatdırıb.

Qeyd olunub ki, Cümhuriyyət Parlamentinin sədri olmuş Əlimərdan bəy Topçubaşovun təqdim olunan kitablarını Azərbaycanın Macarıstandakı səfiri, filologiya elmləri doktoru Vilayət Quliyev nəşrə hazırlayıb. AMEA-nın vitse-prezidenti kitabların AXC dövrünün öyrənilməsi baxımından əhəmiyyətini vurğulayıb. Diqqətə çatdırılıb ki, V.Quliyev uzun illər Cümhuriyyət qurucuları ilə bağlı tədqiqatlar aparıb və dövri mətbuatda çap etdirib.

Akademik Cümhuriyyətin Paris Sülh Konfransında de-fakto tanınmasında Azərbaycan nümayəndə heyətinin rəhbəri Əlimərdan bəy Topçubaşovun diplomatik bacarığının mühüm rol oynadığını və sözügedən kitablarda bunun əks olunduğunu deyib.

Tədbirdə çıxış edən Vilayət Quliyev rus dilindən tərcümə olunan “Əlimərdan bəy Topçubaşov. Doğma Azərbaycanın mənafeyini qoruyacağıq” və ingilis dilindən tərcümə edilən “Əlimərdan bəy Topçubaşov. Qafqaz Azərbaycanı nümayəndə heyətinin Sülh Konfransından tələbləri” kitabları barədə məlumat verib. Bildirib ki, birinci kitabda 1919-1920-ci illərdə Topçubaşovun Parisdən Azərbaycan hökumətinə göndərdiyi məlumatlar, eləcə də məqalələri və yazışmaları toplanıb. İkinci topluda həmin dövrdə Azərbaycanın sərhədləri, tarixi, iqtisadiyyatı, coğrafiyası, 31 mart soyqırımı və digər məlumatlar yer alıb. V.Quliyev AXC dövrü ilə bağlı tədqiqatlarını davam etdirəcəyini söyləyib.

AMEA Nizami Gəncəvi adına Ədəbiyyat İnstitutunun şöbə müdiri, professor Asif Rüstəmli diplomat və alim V.Quliyevi Cümhuriyyət dövrünün fədakar tədqiqatçısı adlandırıb.

AMEA Folklor İnstitutunun direktoru, akademik Muxtar İmanov kitabda arxiv materiallarının sistemli şəkildə oxuculara çatdırıldığını xüsusi qeyd edib.

AMEA-nın müxbir üzvü Tehran Əlişanoğlu və professor Gülər Abdullabəyova V.Quliyevin sözün düzünü deyən tənqidçi olmasından, eləcə də diplomatik fəaliyyətindən danışıblar.

Mədəniyyət.- 2018.- 6 iyul.- S. 11.