Dahi bəstəkar
tələbələrinin yaddaşında
İyunun 4-də Azərbaycan Bəstəkarlar
İttifaqında görkəmli bəstəkar Qara Qarayevin 100
illiyinə həsr olunmuş “Qara Qarayevin sinfinin məzunları”
adlı tədbir keçirilib.
Bəstəkarlar
İttifaqının sədri, Xalq artisti Firəngiz Əlizadə
çıxış edərək dahi sənətkarın
həyat və yaradıcılığından
danışıb. Vurğulayıb ki,
yaradıcılığı zəngin milli
köklərə əsaslanan Qara Qarayev Azərbaycan musiqisinin
yeni mərhələdə
inkişafını təmin edən şəxsiyyətlərdəndir.
Qara Qarayev yaradıcılığının böyük məktəb olduğunu
deyən F.Əlizadə dahi bəstəkarın
yaratdığı musiqi ənənələrindən
söz açıb: “O, bütün
həyatı boyu Azərbaycan musiqisinin inkişafına
çalışıb. O, bizim
muğamlarımızı, aşıq sənətimizi də
dərindən öyrənib, bu barədə
məqalələr yazıb. Biz Qara Qarayevin tələbələri
olaraq onun qoyduğu şərəfli missiyanı davam etdirməyə
çalışırıq”.
Bildirilib ki, görkəmli sənətkarın əsərləri
bu gün də dünya səhnələrində səslənməklə
mükəmməlliyini bir daha
sübut edir. O, bir çox filmlərə,
tamaşalara musiqi bəstələyib.
Dünya şöhrətli bəstəkarın
əsərləri keçmiş SSRİ
respublikalarında, ABŞ, Polşa, Misir, İspaniya, İtaliya, Fransa, Yaponiya və Almaniyada
keçirilən möhtəşəm musiqi
tədbirlərində müvəffəqiyyətlə səsləndirilib.
Onun Nizami Gəncəvinin “Yeddi
gözəl” poemasından bəhrələnərək
yaratdığı “Yeddi gözəl” və
Cənubi Afrika yazıçısı Piter Abrahamsın romanı əsasında
yazdığı “İldırımlı yollarla”
baletləri dünyanın bir sıra
ölkələrində uğurla nümayiş olunmaqdadır.
Böyük
bəstəkarın tələbələri – xalq
artistləri Tofiq Bakıxanov və Azər
Dadaşov, əməkdar incəsənət
xadimləri Cəlal Abbasov, Elnarə Dadaşova, Faiq
Nağıyev və Nərgiz Şəfiyeva
çıxış edərək müəllimləri
haqqında xatirələrini bölüşüb,
zəngin
yaradıcılığından bəhs ediblər.
Tədbir konsert proqramı
ilə davam edib.
Mədəniyyət.- 2018.- 6 iyun.- S.7.