“Sənət
uğurlarımın ünvanı Azərbaycandır”
Gənc ifaçı vətəndən
uzaqda ölkəmizi layiqincə təmsil edir
Beynəlxalq müsabiqələr laureatı, Prezident təqaüdçüsü, İspaniyanın Kraliça Sofiya adına Ali Musiqi Məktəbində təhsil alan violin ifaçısı Kamran Ömərli vətəndən uzaqda ölkəmizi layiqincə təmsil edir. Müxtəlif konsert və yarışmalara qatılan ifaçı son illərdə qazandığı nailiyyətlərlə bizi də tanış etdi.
Kamran Ömərli 2015-ci
ildən İspaniyanın Santander şəhərində
keçirilən festivalda iştirak
edir. Ənənəvi festival
çərçivəsində konsertlər, ustad
dərsləri, təqdimatlar keçirilir.
Budəfəki festivalda Kamran
müəllimi, professor Zaxar
Bronla duet konsert proqramı təqdim edib.
Kamera orkestrinin müşayiəti ilə
baş tutan konsert çox uğurla keçib. Bundan əlavə, festival boyunca
o, solo proqramlarla da çıxış edib və “Paqanini kaprizləri”ndən 4-cü konsert
layihəsində İspaniyanın
Kantabriya əyalətində
solo konsertdə tamaşaçıların
rəğbətini qazanıb.
Bu gün İspaniyanın
məşhur klassik musiqi kanalında Kamranın ifaları səslənir. Bu da,
təbii ki, ölkəmizin musiqi mədəniyyətinin təbliği
baxımından olduqca
mühümdür. Müsahibimiz
qeyd edir ki, Kraliça Sofiya adına
Ali Musiqi Məktəbinin
ənənəsinə uyğun
olaraq hər tədris ilində bütün kafedralardan ən yaxşı tələbə seçilir.
Həmin tələbə
isə ilin sonunda Kral sarayında
təşkil edilən
möhtəşəm bağlanış
mərasimində şəxsən
kraliça ilə görüşərək onun
mükafatına layiq görülür: “Artıq
2014-cü ildə bu
diploma layiq görülmüşdüm.
Lakin mən professor Zaxar Bronun kafedrasının ən yaxşı tələbəsi kimi növbəti dəfə seçilərək Kral Teatrında keçirilən
mərasimə qatıldım
və Kraliçanın
əlindən növbəti
diplomu aldım. Bu təkcə mənim
deyil, Azərbaycan musiqisinin uğuru, bir azərbaycanlı olaraq isə özüm üçün
çox qürurverici
haldır. Çünki İspaniyada belə mötəbər bir titulu qazanmaq çox çətindir.
Burada istedaddan əlavə, hər bir fəndən
bütün professorların
rəyləri də nəzərə alınır
və tələbə
məhz müsbət rəylərdən sonra bu ada layiq
görülür”.
Ötən il orkestrlərlə bir neçə konsertlə çıxış edən
ifaçı bu konsertləri yaradıcılığı
üçün təcrübə
kimi dəyərləndirir.
O, konsertlərdə səhnəyə
həm ifaçı,
həm də konsertmeyster kimi çıxaraq özünü
sınayıb. Konsertlərin Madridin “Milli auditoriya” zalında, Kral Teatrında baş tutduğunu nəzərə alsaq, nə qədər məsuliyyətli olduğunu
düşünmək olar.
Bu ilin əvvəlində müəllimi Zaxar Bronun 70 illiyi ilə əlaqədar keçirilən müsabiqə
turunda iştirak edən ifaçı İsveçrənin Baden, Almaniyanın
Berlin, Düsseldorf və Parisin
Notr-Dam kilsəsində
də unudulmaz konsertlər verib. Bu konsertlərdə o, Vadim Repin, Maksim Vengerov
kimi məşhur sənətçilərlə eyni
səhnəni bölüşüb.
İfaçının son uğurlarından
biri də bu il martın 23-də İspaniyanın
Arnuero şəhərində
keçirilən “Ecoparque
de Transmiera” kamera musiqisi yarışmasında
“Fundacion Mahou San
Miguel” triosu ilə birincilik qazanması olub. V.Motsart, R.Şuman və D.Şostakoviçin əsərlərini
ifa edən Kamran yarışmanın ən yaxşı skripkaçısı adına layiq görülüb. Bu uğurdan sonra o, İspaniyanın Santillana
del Mar şəhərində konsertə dəvət alıb. Gənc ifaçının bu yarışmada layiq görüldüyü
diplom İspaniya Kraliçası tərəfindən
mükafatlandırıldığı üçüncü diplomdur.
Sevindirici haldır ki,
bu diplomlar ifaçılığın fərqli
kateqoriyalarında qazanılıb.
Musiqiçi qarşıda hələ çox planları olduğunu deyir: “Bu il bakalavr diplomunu alıram və gələn il magistr təhsilimi davam etdirəcəyəm. İspaniyada təhsil almağımda Heydər Əliyev Fondu və Mədəniyyət Nazirliyinin böyük dəstəyi olub. Bu yolda mənə dəstək göstərən hər kəsə təşəkkür edirəm”.
Lalə AZƏRİ
Mədəniyyət.- 2018.- 13 iyun.- S.13.