Nazir Ramazan bayramı
münasibətilə mədəniyyət ictimaiyyətini təbrik
edib
Mədəniyyət naziri
Əbülfəs Qarayev ölkəmizin mədəniyyət
ictimaiyyətini müsəlman dünyasının müqəddəs
Ramazan bayramı münasibətilə təbrik edib.
Təbrikdə islam dininin humanist
dəyərlərinin təcəssümü olan Ramazanın
insanları birliyə, bərabərliyə, paylaşmağa,
eyni zamanda nəfsinə hakim olmağa səslədiyi qeyd
olunur. Bildirilir ki,
insanın ruhu və cismi
üçün olduqca
böyük önəm kəsb edən orucluq mənəviyyatımıza müsbət
təsir göstərən ilahi qüdrətə
malikdir.
Orucluq ilin
qısa bir dövrünü
əhatə etsə də, onun gətirdiyi
mənəvi zənginlik, ruhi rahatlıq özünü və cəmiyyəti dərk
etmək baxımından böyük əhəmiyyət
kəsb edir. Ona
görə də “On bir
ayın sultanı” olaraq xarakterizə edilən
bu mübarək bayramın hikmət və
fəziləti islam fəlsəfəsində
çox önəmli yerə sahibdir.
“Tarixən Azərbaycanda islam dəyərlərinə, irsinə
bağlılıq olmuşdur. Ölkəmizdə
islam mədəniyyətini zənginləşdirən
qədim maddi mədəniyyət nümunələrinin
çoxluğu xalqımızın bu dinin ali
ideyalarına olan ehtiramının mühüm göstəricisidir. Xalqımız tarixin müxtəlif dönəmlərində
çətin sınaqlardan keçsə də, öz adət-ənənələrini, həmçinin
islam dininin dəyərlərini
qoruyub yaşatmışdır. Azərbaycanda
həmişə islami dəyərlər
və dünyəvilik vəhdətdə olmuşdur.
Prezident İlham
Əliyevin sərəncamı ilə 2017-ci il
ölkəmizdə “İslam həmrəyliyi
ili” elan edilmiş, həmin il may ayının 12-dən 22-dək Bakıda IV
İslam Həmrəyliyi Oyunları yüksək səviyyədə
keçirilmişdir. Bu
il Azərbaycanın qədim və zəngin
mədəniyyət beşiklərindən olan
Naxçıvan şəhəri “İslam
mədəniyyətinin paytaxtı” missiyasını yerinə yetirir”, - deyə təbrikdə
vurğulanır.
Əbülfəs
Qarayev təbrikin sonunda
mədəniyyət ictimaiyyətinə müqəddəs bayram münasibətilə
cansağlığı, ailə səadəti və ölkəmizin
tərəqqisi naminə yeni uğurlar arzulayıb.
Mədəniyyət.- 2018.- 15 iyun.- S.4.