Ölkəmiz
Moskvada “İntermuzey-2018” sərgisində təmsil olunub
Moskvada “İntermuzey”
beynəlxalq festivalı özünün 20-ci yubiley sərgisini
reallaşdırıb. 29 may - 4 iyun tarixlərində gerçəkləşən
sərgi Rusiya paytaxtında professional muzey
işçilərinin toplandığı yeganə beynəlxalq
format hesab olunur.
“Muzey və cəmiyyət” mövzusuna
həsr olunan sərgidə Azərbaycan Mədəniyyət
Nazirliyinin dəstəyi ilə Xalça Muzeyi və Azərbaycan
Musiqi Mədəniyyəti Dövlət Muzeyi də iştirak edib.
Musiqi Mədəniyyəti
Dövlət Muzeyinin direktoru,
Əməkdar mədəniyyət işçisi
Alla Bayramova bizimlə
söhbətində bildirdi ki, “İntermuzey” beynəlxalq
festivalında 2012-ci ildən iştirak
edirlər. Muzeyin builki
stendi Musiqi Muzeyləri
və Kolleksiyaçıları Beynəlxalq Assosiasiyası ilə
birgə təşkil edilib. Sərgidə
dahi bəstəkar Qara
Qarayevin 100, Azərbaycan Musiqi Mədəniyyəti
Dövlət Muzeyinin 50 və muzeydə fəaliyyət
göstərən Musiqi Həvəskarları
Klubunun 10 illiyinə dair
təqdimatlar olub. Həmçinin Rusiya Milli Musiqi
Muzeyinə Qara Qarayevin yubileyi ilə bağlı
sərgidə nümayiş olunmaq üçün eksponatlar təqdim edilib.
A.Bayramova Moskvaya səfəri zamanı Rusiya
Ədəbiyyat və İncəsənət Dövlət
Arxivində Qara Qarayevin
irsi ilə əlaqədar araşdırma da aparıb. Bəstəkarın maraqlı arxiv materialları, o
cümlədən ulu öndər Heydər
Əliyevə, müəllimi Dmitri
Şostakoviçə yazdığı məktubların,
1961-ci ildə Amerikaya səfəri
zamanı yol qeydləri və digər sənədlərin
surəti əldə olunub.
Muzeyin direktoru bildirdi ki, iyunun 27-də Rusiya Milli Musiqi
Muzeyində Qara Qarayevin
100 illiyinə həsr edilmiş sərgi
açılacaq. Sərgidə Azərbaycan Musiqi Mədəniyyəti Dövlət
Muzeyinin təqdim etdiyi
eksponatlarla yanaşı, bəstəkarın
Tretyakov Dövlət Qalereyasında qorunan, SSRİ Xalq rəssamı
Tahir Salahov tərəfindən
yaradılan portreti, habelə Rusiyanın Kino
Muzeyində saxlanılan eksponatlar nümayiş olunacaq.
Eləcə də bəstəkarın əlyazmaları,
kitabları, dostlarına məktubları və əsərləri
haqqında sənədlər təqdim ediləcək.
“İntermuzey-2018”
sərgisində Xalça Muzeyi
tərəfindən Azərbaycan xalçaları və
xalçaçılıq sənəti ilə bağlı nəşrlər
təqdim olunub. Muzeyin
baş mütəxəssisi Aynur Məmmədova dünyada
ilk ixtisaslaşdırılmış Azərbaycan
Xalça Muzeyi
haqqında məlumat verib. Bildirilib
ki, muzeydə Azərbaycan xalça
və kilimlərinin ən böyük
kolleksiyası saxlanılır. Muzeyin beynəlxalq
əlaqələri haqqında danışan A.Məmmədova bu ilin noyabr
ayında Ümumrusiya Dekorativ
və Tətbiqi Sənət Muzeyində keçiriləcək
“Yeddi gözəl” adlı birgə sərgi
haqqında da söz
açıb. Diqqətə çatdırılıb ki, sərgi dünya
şöhrətli şair, mütəfəkkir
Nizami Gəncəvinin “Yeddi
gözəl” poeması və böyük
bəstəkar Qara Qarayevin
eyniadlı baletinə ithaf ediləcək.
“Yeddi
gözəl” sərgisi Azərbaycanın tolerantlıq mədəniyyətini,
gözəllik və sənət haqqında ənənələri
nümayiş etdirəcək.
Lalə
AZƏRİ
Mədəniyyət.-
2018.- 15 iyun.-
S.10.