Novator tanınmış tarzən haqqında film

 

İyunun 20-də Azərbaycan Milli Konservatoriyasında tarzən, Əməkdar artist, professor Həmid Vəkilovun yaradıcılığına həsr edilmiş Novator filminin təqdimatı keçirilib.

Filmin nümayişindən əvvəl ssenari müəllifi, Əməkdar mədəniyyət işçisi Səadət Təhmirazqızı tarzənin həyat və yaradıcılığından söhbət açıb. Bildirib ki, ekran əsərində Həmid Vəkilovun Azərbaycan Televiziyasının fondunda saxlanılan ifalarından istifadə edilib.

Sonra film təqdim olunub. Ekran əsərində Xalq artisti, professor, Milli Konservatoriyanın rektoru Siyavuş Kəriminin, Əməkdar artist Sahib Paşazadənin, konservatoriyanın müəllimi Məmmədəli Məmmədov və başqalarının Həmid Vəkilovun musiqi mədəniyyətimizə töhfələrinə dair fikirləri yer alıb.

Filmin nümayişindən sonra çıxış edən Bəstəkarlar İttifaqının katibi, Əməkdar incəsənət xadimi Zemfira Qafarova tarzənin özünəməxsus yaradıcılıq üslubundan danışıb. Vurğulayıb ki, Həmid Vəkilov tarı ilk dəfə ayaqüstə böyük məharətlə ifa edən sənətkar kimi tanınıb.

Filmin quruluşçu rejissoru Namiq Zeynalov ekran əsərində virtuoz ifaçı, novator sənətkarın canlı obrazını yaratmağa çalışdığını bildirib, Həmid Vəkilovun öz bəstələrinin də olduğunu söyləyib.

Sonda Tar mənim həyatımdır, tar mənim, mən tarınam! deyən Həmid Vəkilov tədbirin təşkilatçılarına iştirakçılara, filmin yaradıcı heyətinə minnətdarlığını bildirib.

 

 

Mədəniyyət.- 2018.- 22 iyun.- S.13.