ABŞ-da keçirilən konfransda Qarabağ xalçalarından danışılıb

Xalça Muzeyinin direktoru Şirin Məlikova ABŞ-da keçirilən XIV Beynəlxalq Şərq Xalçaları Konfransında (İCOC) ölkəmizi təmsil edib.

Muzeydən bildirilib ki, Şirin Məlikova konfransda “Azərbaycan Xalça Muzeyinin kolleksiyasının zənginləşmə mənbələri” mövzusunda məruzə ilə çıxış edib. O, muzeyin nadir xalçaları, tikmələri, reallaşdırılan layihələr haqqında məlumat verib.

Əsrlər boyu Azərbaycandan çıxarılmış nadir xalçalarımızdan danışan Şirin Məlikova Qarabağın “Bağçada güllər” xalçasının taleyindən də söz açıb. Bildirib ki, onu San-Fransiskoda “qədim erməni xalçası” adı altında satırdılar. “İşğal olunmuş ərazidə çoxlu sayda muzeylər, talan edilmiş və erməniləşdirilmiş artefaktlar qalıb. “Bağçada güllər” xalçası dünya “səyahətindən” sonra Vətənə qayıtmış ilk nümunədir”, – deyə Ş.Məlikova vurğulayıb.

Muzeyin kolleksiyasının zənginləşmə mənbələrindən söz açan direktor rəhbərlik etdiyi mədəniyyət ocağının 50 illiyi ərəfəsində Vyanadan XVII əsrin sonlarına aid “Şamaxı” xalçasının əldə edildiyini, Heydər Əliyev Fondu tərəfindən “Sotheby’s” hərracında əldə olunan, XVIII əsrə aid tikmənin muzeyə hədiyyə edildiyini deyib. Uzun müddət xarici ölkələrdə şəxsi kolleksiyada olmuş Qarabağa aid “Əjdahalı” xalçasının da muzeyə Heydər Əliyev Fondu tərəfindən hədiyyə edildiyi diqqətə çatdırılıb.

Şirin Məlikova müxtəlif muzey toplularına amerikalı kolleksiyaçılar tərəfindən hədiyyə edilmiş Azərbaycan xalçalarının siyahısını da təqdim edib. Onların sırasında kolleksiyaların ən qiymətli eksponatları sayılan unikal nümunələr var.

Mədəniyyət.- 2018.- 29 iyun.- S.16.