“Nəsimi poeziyası” bədii qiraət müsabiqəsi davam edir

Mədəniyyət və Turizm Nazirliyinin təşkilatçılığı ilə şəhər (rayon) mərkəzi kitabxanalarında məktəblilər arasında keçirilən “Nəsimi poeziyası” adlı bədii qiraət müsabiqəsi davam edir. Müsabiqənin fevral ayında başlanan I turu iki mərhələdən ibarətdir və aprel ayınadək davam edəcək.

Sabirabad rayon M.Ə.Sabir adına Mərkəzi kitabxanada bədii qiraət müsabiqəsinin birinci mərhələsi keçirilib. MKS-nin direktoru Eldar Urufov müsabiqə haqqında məlumat verib. Sonra şagirdlərin çıxışları dinlənilib. 48 nəfər iştirakçı arasından 8 nəfər seçilib. Martın 9-da keçiriləcək növbəti dinləmədə onlardan bir nəfər (MKS üzrə) qalib ikinci mərhələyə vəsiqə qazanacaq.

* * *

Xaçmaz rayon Mərkəzi kitabxanasında “Nəsimi poeziyası” qiraət müsabiqəsində 1-ci turun sonuncu mərhələsi olub. İlk dinləmədə seçilmiş 15 məktəbli arasından Xaçmaz şəhər 2 saylı məktəbin VII sinif şagirdi Nigar Bəybalayeva qalib kimi növbəti mərhələyə keçib.

* * *

Qax rayon C.Cabbarlı adına Mərkəzi kitabxanada da bədii qiraət müsabiqəsinin I turunun ilk mərhələsi keçirilib. İlk dinləmədə 26 məktəbli arasından 12 nəfər seçilib. Növbəti dinləmədə Qax şəhər 2 saylı orta məktəbin XI sinif şagirdi Jalə Əfəndiyeva qalib olaraq Şəkidə (regional idarə üzrə) keçiriləcək ikinci mərhələdə iştirak etmək hüququ qazanıb.

* * *

Gəncə Regional Mədəniyyət və Turizm İdarəsinin tabeliyində fəaliyyət göstərən Goranboy rayon MKS-də də “Nəsimi poeziyası” müsabiqəsinin I turunun ilk mərhələsi başa çatıb. Şagirdlərdən 3 nəfər münsiflər tərəfindən seçilərək növbəti dinləmə mərhələsinə keçib.

* * *

Astara rayon Mərkəzi kitabxanasında müsabiqənin birinci mərhələsində 38 şagird iştirak edib. Məktəblilər İmadəddin Nəsiminin yaradıcılığından qəzəllər və qəsidələr ifa ediblər. Münsiflər heyətinin qərarına əsasən, fərqlənən 6 nəfərə fəxri fərman verilib. Siyakü kənd tam orta məktəbin X sinif şagirdi Ruhiyyə Quluzadə qalib elan olunub və müsabiqənin birinci turunun ikinci mərhələsində iştirak hüququ qazanıb.

Mədəniyyət.- 2018.- 2 mart.- S.7.