Cümhuriyyətin 100 illik yubileyi münasibətilə Çində konsert proqramı

 

 

   Müsəlman Şərqində ilk demokratik, dünyəvi dövlət olan Azərbaycan Xalq Cümhuriyyətinin 100 illik yubiley tədbirləri çərçivəsində Çinin Siçuan vilayətinin inzibati mərkəzi olan Çendu şəhərində konsert proqramı təşkil olunub.

   Ölkəmizin Çin Xalq Respublikasındakı səfirliyinin Siçuan vilayət hökumətinin dəstəyi ilə təşkil etdiyi konsertdə gənc tarzən Şəhriyar İmanovonun qrupunun ifasında etno-caz musiqisi böyük maraqla qarşılanıb. Qrupun ifasında “Əlində sazın qurbanı” xalq mahnısı, Fikrət Əmirovun “Laylay”, Səid Rüstəmovun “Hardasan” mahnıları, tarzənin özünün bəstələdiyi “Ağlayan şəlalə”, gənc bəstəkar və mahir pianoçu Etibar Əsədlinin müəllifi olduğu kompozisiyalar səslənib.

   Konsertin ikinci hissəsində çinli musiqisevərlər Azərbaycanın muğam sənəti ilə yaxından tanış olublar. Gənc ifaçılar Hüseyn Məlikov, Nigar Şabanova, tarzən Kamal Nuriyev, kamança ifaçısı Ceyhun Muradovun təqdimatında səslənən muğamlarımız, xalq mahnılarımız, “Leyli və Məcnun”dan parçalar, “Şahnaz” təsnifi, “Qarabağ şikəstəsi” tamaşaçıları Azərbaycan musiqisinin sehrinə salıb.

   * * *

   Bu günlər Çendu şəhərində "Musiqi Olimpi" Beynəlxalq festivalı da keçirilir. Festivala Azərbaycanın Əməkdar artisti, Dövlət Akademik OperaBalet Teatrının dirijoru Əyyub Quliyev də qatılıb.

   Martın 17 və 18-də reallaşan konsertlərdə dirijor Əyyub Quliyevin rəhbərliyi altında Siçuan Simfonik orkestri rəngarəng proqramla çıxış edib. Beynəlxalq festival martın 23-nə qədər davam edəcək.

 

Mədəniyyət.- 2018.- 20 mart.- S.2.