Sərhəd tanımayan
tamaşalar - “Sərhədsiz
teatr”da
Mayın 12-də
Azərbaycan Respublikasının
Mədəniyyət Nazirliyi,
Şəki Şəhər
İcra Hakimiyyəti və Azərbaycan Teatr Xadimləri İttifaqının təşkilatçılığı
ilə “Sərhədsiz
teatr” III Şəki Beynəlxalq Teatr Festivalı başlayacaq. Bir həftə davam edəcək festival günlərində
xarici ölkələri
təmsil edən 6, ölkəmizin səhnə
sənəti kollektivlərindən
isə 16 teatr Azərbaycan teatrsevərlərinə
sənət ünsiyyəti
sevinci yaşadacaq.
Artıq ənənəyə
çevrilən Şəki
teatr festivalı bu il ümummilli
lider Heydər Əliyevin anadan olmasının 95, Azərbaycan
Xalq Cümhuriyyətinin
yaradılmasının 100, Azərbaycan milli peşəkar teatrının
145 illiyinə həsr
olunur.
Hər dəfə öz
səhnə məkanını
və iştirakçı
coğrafiyasını genişləndirən
Şəki teatr festivalının “Sərhədsiz
teatr” adlanması təsadüfi deyil. Bu dəfə əcnəbi
qonaqlarımız - yaxın
İrandan, Gürcüstandan,
nisbətən uzaq Şimali Osetiya və Tatarıstandan (Rusiya), bir də
lap uzaqdan - Kolumbiya və Meksikadan olacaqlar. Tamaşaların nümayiş məkanına
gəlincə, festival ölkəmizin
bir çox şəhər və rayonlarını əhatə
edəcək. Daha kimsə
deməyəcək ki,
yaxında olsaydı, gedib baxardıq. Festivalın ev sahibi Şəki ilə yanaşı paytaxt Bakı, Sumqayıt, Yevlax, Ağdam, Xırdalan, Bərdə, Lənkəran,
Neftçala, Göygöl,
Ağcabədi, Xaçmaz,
İsmayıllı, Mingəçevir,
Salyan və Qusar da “Sərhədsiz
teatr” ovqatına köklənəcək.
Bəs, qonaqlarımız hansı kollektivlərdir, onlar hansı tamaşa ilə çıxış edəcəklər?
Qəzetimizin bu sayından etibarən oxucuları “Sərhədsiz
teatr” festivalının
iştirakçıları ilə tanış
etməyə başlayırıq.
Açılış
şərəfi “Titowak”a
qismətmiş...
İran İslam Respublikası
“Sərhədsiz teatr”
festivalında iki kollektivlə təmsil olunacaq. Şəkidə baş tutacaq
beynəlxalq proqramın
ilk günündə, mayın
12-də bu ölkədən
gəlmiş “Titowak” teatrı U.Şekspirin “Maqbet” faciəsi əsasında hazırlanmış
“Maqbet-Zar” tamaşasını
oynayacaq. Yeri gəlmişkən,
“Titowak” bizim az-çox bələd olduğumuz Tehran, Təbriz,
ya da Ərdəbil
teatrlarından biri deyil, İranın ən cənub vilayətindən - Hörmüzqan
ostanının Bəndər-Abbas
şəhərindəndir. 20 il əvvəl
22 yaşlı rejissor
Ebrahim Poştkohinin yaratdığı gənclərdən
ibarət həvəskar
teatr truppası uzun illərdir ki, dünyanın müxtəlif teatr festivallarında uğurla çıxış edir.
2012-ci ildə Rusiyada, Mıtışşi şəhərində
keçirilmiş IV “Moskvaətrafı
axşamlar” teatr festivalında “Maqbet-Zar”ı
oynamış kollektivin
çıxışından sonra rus teatr
tənqidçilərinin yazılarını
internet resurslarında nəzərdən
keçirmək kifayətdir
ki, Şəki festivalının açılışı
günü maraqlı
tamaşa görəcəyimizə
əmin olaq. Elə adıçəkilən
festivalda “Münsiflər
heyətinin aktyor ansamblına rəğbəti”
mükafatına layiq görülmüş teatrın
baş rejissoru tamaşa barədə bu fikirləri söyləmişdi: “Biz tamaşada
Şərq və Qərb mədəniyyətini
birləşdirmək istəmişik.
Lakin tamaşada təkcə Zərdüştilik dövrünün
Zar ayinindən yox, digər çox qədim teatr ənənələrindən
istifadə edilib.
Biz tamaşalarımızı
hər kəsin anlaya biləcəyi tərzdə qururuq. Teatr hər kəs üçün mənəvi
qidadır. Rejissor isə
aşpazdır. Əsas məsələ
xörəyi yaxşı
bişirməyi, ərzaqları
düzgün qarışdırmağı
bacarmaqdır. O ki
qaldı bizim niyə məhz “Maqbet” faciəsini seçməyimizə, məncə,
bu əsərdə qaldırılan problemlər
yenə də aktualdır. Zar ayininin məqsədi
insan qəlbinə soxulmuş bəd ruhları qovmaqdır.
Şekspirin Maqbeti insanların
qətlinə amansızlıqla
fərman verən canidir. Bizim qurduğumuz süjetdə
isə Maqbet - “bəd ruhun kölə»sinə çevrilmiş
zavallıdır. Tamaşanın sonunda o, bəd ruhların təsirindən
qurtulur, tövbə edir və bu
dünyadan rahat köçür”.
Beləliklə, festivalın ilk günü
bol emosiya və düşünmək
üçün mövzu
vəd edir.
...Aldı görək, “Əlif” nə dedi?
Mayın 15-də
S.Rəhman adına
Şəki Dövlət
Dram Teatrının səhnəsi
Tatarıstanın paytaxtı
Kazandan gələcək
“Yaradıcı mühit”
Mədəni Təşəbbüslər
Fondunun ixtiyarına veriləcək. Fond “Əlif” (“Başlanğıcın
çağırışı”) adlı tamaşa göstərəcək. Yaradıcı
insanların istedadını,
gücünü və
biliyini bir yerə cəmləyib yeni bədii forma və mənaların axtarışını və
mənimsənilməsini öz
məqsədi bilən
“Yaradıcı mühit”də
hazırlanmış “Əlif”
tamaşası ilk dəfə
12 iyul 2017-ci il tarixində oynanılıb.
Bu il “Balet - müasir rəqs-kişi rolu” nominasiyasında Rusiyanın nüfuzlu “Qızıl maska” mükafatına layiq görülmüş “Əlif”
tamaşası haqqında
festivalın təşkilat
komitəsinə göndərilmiş
annotasiyada deyilir ki, 1927-ci ildə ərəb əlifbasına
əsaslanan tatar əlifbası dəyişdirildi
(eyni proses Azərbaycanda da getdi - G.M.), qəbul edilmiş latın qrafikası isə 1939-cu ildə kiril əlifbası ilə əvəzləndi. Bu dəyişiklik əlifbadakı
yeddi hərfin ləğv edilməsi ilə nəticələndi.
Həmin
dövrə qədər
yaranmış poetik nümunələrdəki qafiyə,
üslub, forma və ritm də öz
əvvəlki mənasını
təhrif etmiş oldu. Bununla da, X əsrdən
etibarən formalaşan
xalqın özgürlüyü
qismən itirildi.
Bu dəyişmə prosesinə həsr olunmuş “Əlif” tamaşası üç
hissədən ibarətdir.
Tamaşanın birinci hissəsində
rəqs vasitəsilə
tatar əlifbası ərəb hərfləri
ilə yazılır.
Həmin
hərflərin adları
səsləndirilir.
İkinci hissədə üç
qız səsi görkəmli tatar şairi Qabdulla Tukayın “Tuqan tel” (“Doğma dil”) şeirini söyləyir. Birinci səs
“itirilmiş” tatar hərflərini tələffüz
edir, ikinci səs sözləri deyir, üçüncü
isə bütün sətri söyləyir.
Tamaşanın
üçüncü hissəsi
ilk iki hissənin üzvi qovuşuğundan ibarətdir: Q.Tukayın şeiri trio şəklində
tam söylənilir. Şairin
proobrazını təqdim
edən rəqqas min il boyunca
tatar xalqını formalaşdırmış həmin
mədəni epoxanı
təcəssüm edir.
“Əlif”
tamaşasının yaradıcıları
vücud dili və autentik tatar ifaçılığı
vasitəsilə xalqın
“unutduğu” həmin mədəni təbəqəyə
nüfuz etməyə,
artıq yaddan çıxmış həmin
mədəniyyətə toxunmağa
çalışıblar. Tamaşaya Tufan İmamutdinov quruluş verib, xoreoqrafı Marsel Nüriyev, bəstəkarı Elmir Nizamov, ifaçısı
isə Kazan Gənc Tamaşaçılar Teatrının
aktyoru Nurbek Batulladır.
“Fırtına”
qonşu Gürcüstandan
gəlir
Mayın 16-da Şəki səhnəsinə
qonşu Gürcüstanı
təmsil edən Hərəkət teatrı
(Movement Theater) çıxacaq. Kaxa Bakuradzenin öz dostları ilə yaratdığı bu sənət ocağını
Gürcüstanda teatr
və canlı musiqi, xüsusən də caz sevənlər
üçün əsl
inci adlandırırlar.
Hərəkət teatrı müasir
gürcü mədəniyyəti
ilə tanışlıq
üçün ideal yer
hesab edilir. Digər teatrlardan fərqli olaraq, bu teatr
əhvalatı yalnız
hərəkət vasitəsilə
nəql edir, bu səbəbdən də kollektivlə tamaşaçı arasında
dil maneəsi olmur. İlboyu müxtəlif quruluşlar,
konsertlər, cem-seyşnlər,
rəqs gecələri
təşkil edən teatr öz repertuarındakı
ən yaxşı tamaşalardan birini Şəkiyə gətirəcək.
Tamaşa barədə danışmazdan
əvvəl bir fikri çatdırmağı
özümüzə borc
bilirik ki, Tbilisi Hərəkət Teatrının
ən heyrətamiz cəhətlərindən biri
tamaşanın oyun məkanından asılı
olmayaraq, seyrçidə
həmişəlik teatr
sevgisini yaratmasıdır.
Salonda əyləşmiş hər
tamaşaçıya elə
gəlir ki, səhnədə baş verənlər məhz onun üçün oynanılır. Teatrın yaradıcısı,
rejissoru, aktyorları və digər əməkdaşları salonda
xoş mühit yaratmaq və sizin özünüzü
evinizdəki tək
hiss etməniz üçün
bacardıqlarını əsirgəmirlər.
Hərəkət teatrı “Sərhədsiz
teatr” festivalında U.Şekspirin “Fırtına”
əsəri ilə çıxış edəcək.
Azərbaycan teatrında cəmi
bir dəfə - uzaq 60-cı illərdə
görkəmli rejissor
Tofiq Kazımovun çox maraqlı quruluşunda səhnəyə
qoyulmuş dram Milan hersoqu
Prospero devrildikdən sonra
onun başına gələn əhvalatlardan
bəhs edir. Tamaşaya İoseb Bakuradze quruluş verib, bəstəkarı Sandro Nikoladze, xoreoqrafı Laşa Robakidzedir. “Fırtına”da aktyorlar Ani Talakvadze, Laşa Robakidze, Beka Qasrenişvili, Elo Çxeidze, Levan Karçiladze, Salu Kavtaradze, Nikoloz Qogidze çıxış edirlər.
* * *
Yazıda haqqında söz açdığımız üç tamaşa, onların təmsil etdiyi kollektivlər barədə deyilənlərdən məlum oldu ki, doğrudan da, teatr sərhəd tanımır. Həm məkan, həm təxəyyül, həm də janr baxımından.
(Ardı var)
Gülcahan Mirməmməd
Mədəniyyət.- 2018.- 2 may.- S.10.