"Vətənə
qaytarılan incilər"
Xalça Muzeyində
"Sırt-Çiçi" və "Xilə-buta"
xalçaları təqdim edilib
Mayın 25-də Xalça Muzeyində Azərbaycan Xalq
Cümhuriyyətinin yaranmasının 100 illiyinə həsr
olunmuş "Vətənə qaytarılan incilər"
adlı tədbir keçirilib.
Tədbirdə muzey iki yeni
xalçanı - Quba qrupuna aid "Sırt-Çiçi"
və Bakı qrupuna aid "Xilə-buta"
xalçalarını təqdim edib. Hər iki xalça
İtaliyada əldə olunub. Tədbirdə
tanınmış italiyalı xalçaçı-ekspert
Andrea Stefano İonesku da iştirak edib.
Mərasimdə çıxış edən muzeyin
direktoru Şirin Məlikova bildirib ki, Quba
xalçalarının ən parlaq bədii quruluşa malik
nümunələrindən biri XIX əsrə aid
"Sırt-Çiçi" xalçasıdır. Bu
kompozisiyalı xalçalar qədim zamanlardan bu günə
kimi Quba rayonunun Sırt-Çiçi kəndində toxunur.
Üfüqi sıralarda düzülmüş
"Muğan" adlandırılan qarmaqlı kiçik
göllərdən ibarət kompozisiya bu xalçalar
üçün xarakterikdir. Xalçanın alınmasında
Azərbaycan Xalça Muzeyi və italiyalı
kolleksiyaçı Andrea Stefano İoneskunun rolu olub.
Bakı xalça qrupuna aid olan "Xilə-buta"
xalçasının bədii quruluşu "Ləçək-turunc"
kompozisiyası əsasında qurulub. Kompozisiya üfüqi
istiqamətdə nizamla düzülmüş eyni quruluşlu
butalardan təşkil olunub. Xalçanın mərkəzində
Bakı xalçaları üçün xarakterik olan
saçaqlı göl, ara sahənin dörd küncündə
ləçəklər təsvir edilib. Məhz buna görə
də bu xalçaları künclü "Xilə-buta"
adlandırırlar.
Xalça Muzeyində son vaxtlar reallaşan tədbirlərin
əhəmiyyətindən danışan mədəniyyət
nazirinin birinci müavini Vaqif Əliyev bu təqdimatın
"Azərbaycan Xalq Cümhuriyyəti ili" çərçivəsində
təşkil olunmasını yüksək dəyərləndirib.
Cümhuriyyətin tarixindən danışan Vaqif Əliyev
bildirib ki, müsəlman Şərqində demokratik, hüquqi
dövlətin ilk dəfə Azərbaycanda qurulması
xalqımız üçün qürurvericidir. Vaxtilə ulu
öndər Heydər Əliyev deyirdi ki, müasir müstəqil
Azərbaycan Xalq Cümhuriyyətinin varisidir. Əsası
ümummilli lider Heydər Əliyev tərəfindən
qoyulmuş Azərbaycanın müstəqilliyi əbədidir,
dönməzdir.
İtaliyalı ekspert Andrea Stefano İonesku xalça sənəti
və xalçaçılığın əhəmiyyətindən
danışıb. Bu sənətin əsrlər boyu
yaşadığını deyən mütəxəssis Azərbaycanın
bu sahəyə verdiyi töhfələrdən bəhs edib.
"Azərxalça" Açıq Səhmdar Cəmiyyətinin
sədr müavini Orxan Rzayev tədbirin önəmindən
danışıb, Azərbaycan xalçaları haqqında
qonaqlara məlumat verib.
Sonra qonaqlar muzeyin ekspozisiyasında yer alan xalçalara
baxıblar.
Mədəniyyət.- 2018.- 30 may.- S. 7.