Bakıda Avropa film festivalı

 

17 ölkədən 19 ekran əsəri nümayiş olunacaq

 

Oktyabrın 10-da Bakıda, Park Cinemada 9-cu Avropa film festivalı başlayıb.

Festival Avropa İttifaqının (Aİ) Azərbaycandakı nümayəndəliyi, Aİ- üzv dövlətlərin, həmçinin Norveçin ölkəmizdəki səfirlikləri tərəfindən təşkil olunub.

Aİ-nin ölkəmizdəki nümayəndəliyinin rəhbəri Kestutis Yankauskas ənənəvi layihənin Avropa ilə Azərbaycan arasında mədəni əlaqələrə töhfə olduğunu vurğulayıb.

Diplomat qeyd edib ki, oktyabrın 21-dək davam edəcək budəfəki festival çərçivəsində 17 ölkədən Belçika, Bolqarıstan, Çex Respublikası, Xorvatiya, Fransa, Almaniya, Macarıstan, İtaliya, Latviya, Litva, Hollandiya, Polşa, Portuqaliya, Rumıniya, İspaniya, İsveç, Birləşmiş Krallıq, Norveç Azərbaycandan 19 film nümayiş olunacaq.

Ötən illərdə olduğu kimi, yenə festival iştirakçıları Avropa kino industriyasının yenilikləri ilə tanış olacaq, tanınmış rejissorlarla müzakirələrdə iştirak etmək imkanı qazanacaqlar. Festivalın qonaqları sırasında hollandiyalı rejissorlar Mark Verkerk İqnas van Şaik, Bolqarıstandan ssenarist Teo Çepilov litvalı rejissor Arunas Matelis yer alıb.

Macarıstanın Azərbaycandakı səfiri Viktor Szederkenyi ölkəsinin festival çərçivəsində nümayiş olunacaq filmləri barədə məlumat verib. Xüsusilə Kimcem filmi barədə ətraflı bəhs edən səfir qeyd edib ki, ekran əsəri Macarıstanda baş vermiş inqilabi hadisələri əks etdirir. Film iki dəfə ingilis dilində (Azərbaycan dilində subtitrlər vasitəsilə) nümayiş etdiriləcək.

Qeyd edək ki, festivalın açılış günündə hollandiyalı rejissorların Vəhşi Amsterdam sənədli filmi göstərilib. Seanslara giriş sərbəstdir.

 

Mədəniyyət.- 2018.- 12 oktyabr.- S.8.