Bərdə zəngin tarixi abidələri ilə turistləri cəlb edir
Azərbaycanda tarixən qədim
şəhərlər mövcud
olub, şəhər mədəniyyəti inkişaf
edib. Bərdə ölkəmizin tarixində
önəmli yer tutan şəhərlərdəndir.
Bir zamanlar Qafqaz Albaniyasının paytaxtı
olmuş Bərdə
IX-X əsrin birinci yarısında çiçəklənmə
dövrünü yaşayaraq,
Yaxın və Orta Şərqin möhtəşəm yaşayış
məntəqələrindən biri kimi məşhurlaşıb.
Həmin zəngin tarixi dövrdən günümüzə
bir sıra abidələr yadigar qalıb. Bu abidələr
Bərdənin qədim
şəhər kimi əzəmətini təcəssüm
etdirməklə yanaşı,
şəhərin tarixinin
aynasına çevrilərək
turizm baxımından
da xeyli önəm daşıyır.
Təmir və bərpası
bu günlərdə başa çatdırılan
Bərdə türbəsi
də rayonun tarixi mədəni irsinin zənginliyindən xəbər verir. 1322-ci ildə inşa
olunan türbə yeraltı və yerüstü hissələrdən
ibarətdir. Yeraltı hissəni
o dövr üçün
xarakterik olan sərdabə təşkil
edir. Türbənin yerüstü qatı
isə xatirə abidəsidir və
monumental xarakter daşıyır.
Türbənin ətrafında daha
qədim tarixə malik Torpaqqala adlı müdafiə divarları mövcuddur.
Bu günlərdə Mədəniyyət və Turizm Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Zakir Sultanov, Bərdə Rayon İcra Hakimiyyətinin başçısı Vidadi İsayev, Bərdə Regional Mədəniyyət və Turizm İdarəsinin rəisi İlyas Hacıyev türbədə aparılan təmir-bərpa işləri ilə tanış oldular. Abidənin yüksək səviyyədə bərpa olunması dövlət tərəfindən mədəni irsimizə göstərilən qayğının bariz nümunəsidir.
Ümumiyyətlə, rayon ərazisindəki tarixi abidələr yerli və xarici turistlərin böyük marağına səbəb olur. XVIII əsrə aid İbrahim məscidi, Tərtər çayı üzərində iki körpü (VII-IX əsrlər), Axsadan baba türbəsi (XIV), Şirvanlı kəndində yerləşən hamam (XVIII-XIX) və digər abidələr Bərdəyə gələn qonaqlarda unudulmaz təəssürat yaradır.
Şəhərin qədim və zəngin mədəniyyətini təcəssüm etdirən tarixi irsin bir hissəsi Tarix-Diyarşünaslıq muzeyində sərgilənir. Turistlər bu muzeydə şəhərin tarixi, inkişafı, əhalinin məşğuliyyəti, yadellilərin basqınları haqqında geniş məlumat ala bilərlər. Bərdə Regional Mədəniyyət və Turizm İdarəsi yaradıldıqdan sonra mədəniyyət müəssisələrinin fəaliyyəti daha da gücləndirilib, xidmət səviyyəsinin yüksəldilməsi istiqamətində addımlar atılıb.
Ölkəmizdə turizmin müxtəlif növlərinin inkişaf etdirilməsi, regionlara turist axınının gücləndirilməsi məqsədilə Mədəniyyət və Turizm Nazirliyi tərəfindən yeni marşrutların yaradılması diqqət mərkəzində saxlanılır, bu istiqamətdə layihələr həyata keçirilir. Ötən il Bərdənin də daxil olduğu “Beş dövrün beş paytaxtı” adlı turizm marşrutunun təqdimatı keçirildi. Bu turizm marşrutuna tarixin müxtəlif dövrlərində Azərbaycan ərazisində yaranmış dövlətlərin paytaxtı olmuş Bakı, Gəncə, Bərdə, Qəbələ və Şamaxı şəhərləri daxildir.
Rayona gələn turistlər Bərdənin timsalında həm də son illərdə Azərbaycan bölgələrinin müasir inkişafının şahidi olurlar. Regionların sosial-iqtisadi inkişafına dair Dövlət proqramlarının icrası, infrastrukturun yenilənməsi bölgənin mədəni və turistik imkanlarını da artırır.
Fariz Hüseynov
Mədəniyyət.- 2018.- 31
yanvar.- S.13.