Milli musiqi alətləri ifaçılarının festivalı

Xəbər verdiyimiz kimi, noyabrın 30-da Oğuz şəhərində Milli musiqi alətləri ifaçılarının yaradıcılıq festivalı təşkil olunub.

Öz ifa xüsusiyyətləri ilə xalqımızın şüurunda milli dəyərlərimizə, azərbaycançılıq ruhuna məhəbbət hissi aşılayan musiqi alətlərimiz mədəni irsimizdə xüsusi yer tutur. Mədəni irsimizin qorunması və dünyada təbliği ilə bağlı Azərbaycan Respublikasının Birinci vitse-prezidenti Mehriban Əliyevanın təşəbbüsü və dəstəyi ilə reallaşdırılan silsilə tədbirlər sayəsində tar və kamança ifaçılığı, eləcə də aşıq sənəti UNESCO-nun Qeyri-maddi mədəni irs siyahısına daxil edilib.

Şəki Regional Mədəniyyət İdarəsinin təşkilatçılığı ilə keçirilən festival da məhz milli musiqi mədəniyyətimizi daha geniş təbliğ etmək, ifaçılıq sənətini inkişaf etdirmək, gənc istedadları üzə çıxarmaq, milli musiqi alətlərimizin qocaman ifaçılarının zəngin təcrübəsini təbliğ etmək və yaymaq məqsədi daşıyıb.

Oğuz rayon Mədəniyyət Mərkəzində gerçəkləşən festivalda regional idarənin əhatə etdiyi Balakən, Zaqatala, Qax, Şəki və Oğuz rayonlarının musiqi kollektivləri, ifaçılar iştirak ediblər. “Zirvə” folklor ansamblının, “Nağaraçalanlar”, “Sənəm” və “Oğuz” qruplarının, muğam üçlüklərinin çıxışları, sazda və tənburda səsləndirilən solo ifalar musiqisevərlər tərəfindən maraqla qarşılanıb.

Konsert proqramı başa çatdıqdan sonra Şəki Regional Mədəniyyət İdarəsinin rəisi Mirvari Zeynalova çıxış edərək festivalın yüksək səviyyədə keçirilməsini təmin etdiklərinə görə kollektivlərə təşəkkürünü bildirib.

Sonda festivalın iştirakçılarına mükafatlar təqdim olunub.

Mədəniyyət.- 2019.- 4 dekabr.- S.4.