Nəsimi filmi rəqəmsal formatda nümayiş etdirildi

 

Xəbər verdiyimiz kimi, Nəsimi ilinə töhfə olaraq dahi şair haqqında 1973-cü ildə Azərbaycanfilm kinostudiyasında lentə alınan film Mədəniyyət Nazirliyinin dəstəyi ilə rəqəmsal formatda yenilənib. Layihə Balans milli rəqəmsal studiyası tərəfindən həyata keçirilib.

Dekabrın 20-də Nizami Kino Mərkəzində Nəsimi filminin yenilənmiş versiyası tamaşaçılara təqdim olundu.

Tədbiri giriş sözü ilə açan Balans studiyasının rəhbəri Vahid Mustafayev qeyd etdi ki, studiya bundan əvvəl Tofiq Tağızadənin Mateo FalkoneAğarza Quliyevin Ulduz bədii filmlərini rəqəmsal formatda yeniləyib. Görkəmli rejissor Həsən Seyidbəylinin Nəsimi filmi bu layihə üzrə yenilənən üçüncü filmdir. Onun sözlərinə görə, Mədəniyyət Nazirliyi ilə birgə layihəyə əsasən daha 15 ekran əsəri bərpa olunacaq.

Nəsimi filmində Nəsiminin ustadı Nəiminin qızı Fatimə obrazını yaratmış Xalq artisti Xalidə Quliyeva bu rola necə seçilməsi haqqında danışdı: Film çəkilən zaman 19 yaşım vardı. Həsən Seyidbəyli məni çağırıb dedi ki, apar, ssenarini oxu. Hansı obrazı bəyənsən, ona da çəkiləcəksən. Mən valideynlərimi çox erkən itirmişdim və Fatimənin ağrı-acısı mənə yad deyildi. Buna görə də Həsən Seyidbəyliyə dedim ki, Fatiməni canlandırmaq istəyirəm. O da etiraz etmədi.

Mərasimdə daha sonra Cəfər Cabbarlı adına Azərbaycanfilm kinostudiyasının direktoru, Əməkdar incəsənət xadimi Cəmil QuliyevXalq artisti Əbdül Mahmudov çıxış edərək filmin rəqəmsal formatda yenilənməsinə görə Balans studiyasına və bu layihəyə dəstək verdiyinə görə Mədəniyyət Nazirliyinə təşəkkürlərini bildirdilər.

Sonda Nəsimi bədii filminin yenilənmiş versiyası nümayiş olundu.

Qeyd edək ki, kinorejissor Həsən Seyidbəyli filmi Xalq yazıçısı İsa Hüseynovun ssenarisi əsasında ekranlaşdırıb. Filmin quruluşçu operatoru Rasim İsmayılov, quruluşçu rəssamları Məmməd HüseynovMais Ağabəyov, bəstəkarı Tofiq Quliyevdir. Baş rolu Rasim Balayevin oynadığı filmdə Yusif Vəliyev, İsmayıl Osmanlı, Səməndər Rzayev, Məmmədrza Şeyxzamanovbaşqa məşhur aktyorlar çəkilib.

 

Nurəddin MƏMMƏDLİ

 

 

Mədəniyyət.- 2019.- 25 dekabr.- S.7.