“Altaydan Atırauya qədər”

Beynəlxalq Türk Mədəniyyəti Təşkilatı – TÜRKSOY-un layihəsi üzrə 23-25 iyun tarixində Qazaxıstanın Atırau şəhərində “Altaydan Atırauya qədər” Müasir türk musiqisi festivalı keçirilib. Festivalda iştirak edən Əməkdar incəsənət xadimi, Üzeyir Hacıbəylinin ev-muzeyinin direktoru, Bəstəkarlar İttifaqının katibi Sərdar Fərəcov təəssüratını bizimlə bölüşdü.

Bəstəkar bildirdi ki, Atırau valiliyi (akimat) və Qazaxıstan Bəstəkarlar İttifaqının dəstəyi ilə gerçəkləşən festivalda TÜRKSOY-un baş katibi Düsen Kaseinov, Atırau valisi (akimi) Nurlan Noqayev, Qazaxıstan Bəstəkarlar İttifaqının sədri Balnur Kadırbek və türkdilli ölkələrin tanınmış musiqi xadimləri iştirak edib.

Baş katib Düsen Kaseinov çıxışı zamanı diqqətə çatdırıb ki, türk dünyasının dəyərli musiqi xadimlərini bir araya gətirən festival gələcəyə olan planlarımızı birgə müzakirə etməyə şərait yaradır.

Sərdar Fərəcov: “Atırauda keçirilən festival türk mədəniyyətinin ölkələrimiz arasında təbliğinə böyük töhfə idi. Festivalda “Narın” Qazax Xalq Çalğı Alətləri Orkestrinin ifasında türk dünyasının böyük bəstəkarlarının əsərləri səsləndirildi. Festivalın qonaqları və iştirakçıları Azərbaycan, Qazaxıstan, Qırğızıstan, Türkmənistan, Özbəkistan, Tatarıstan, Başqırdıstan, Xakasiya, Uyğur musiqi örnəklərinin təqdim olunduğu gecədə türk xalqlarının musiqi mədəniyyətinə səyahət etmiş oldular”.

Həmsöhbətim bildirir ki, Qazaxıstanda 17 orkestr fəaliyyət göstərir və qaydalara əsasən bir orkestr yeni əsər ifa edirsə, bütün orkestrlər həmin əsərləri ifa edirlər. Demək, bu festival çərçivəsində səslənən bütün əsərlər Qazaxıstanın şəhərlərində ifa edilərək təbliğ ediləcək: “Festivalda mənim “Koroğlu əfsanəsi” simfonik freskam və bəstəkar İlham Azmanlının “Azərbaycan bayrağı” əsəri də səsləndi. “Azərbaycan bayrağı” əsərini Qazaxıstanın Abay adına Opera və Balet Teatrının solistləri, tanınmış vokalçılar Gulzat Daurbayeva ve Darhan Joldıbayev ifa etdi. Hər dəfə mahnının nəqarətində “Azərbaycan bayrağı” sözləri təkrarlananda salonda alqış sədaları eşidilirdi. Atırau şəhərinin valiliyi qazax şeirinin 10 cildlik antologiyasını qonaqlara hədiyyə etdi. İnanıram ki, Üzeyir bəyin ev-muzeyinə hədiyyə olan bu antologiya ədəbiyyatsevərlərə də böyük töhfə olacaq. Yüksək səviyyədə təşkilatçılıqla gerçəkləşən festivalda yeni əsərlərin təqdim olunması ilə yanaşı, müxtəlif ölkələrdən həmkarlarımızla fikir mübadiləsi ilə də yadda qaldı və türk dünyası musiqiçilərinin növbəti görüşlərinin keçirilməsi arzusu ilə yekunlaşdı”.

Sərdar Fərəcov onu da qeyd etdi ki, türk dünyasının növbəti musiqi bayramları Başqırdıstanda keçiriləcək Türk xalqları çağdaş musiqi festivalı və Tatarıstanda təşkil ediləcək Avrasiya musiqi festivalı olacaq.

Mədəniyyət.- 2019.- 5 iyul. S. 6.