Tanınmış şair və dramaturq Kəmalə Ağayeva vəfat edib

Azərbaycan mədəniyyətinə itki üz vermişdir. Tanınmış şair, dramaturq, Əməkdar incəsənət xadimi, Əməkdar mədəniyyət işçisi, Azərbaycan Yazıçılar Birliyinin və Azərbaycan Teatr Xadimləri İttifaqının üzvü, Prezident təqaüdçüsü Kəmalə Ağa qızı Ağayeva 2019-cu il iyul ayının 18-də vəfat etmişdir.

Kəmalə Ağayeva 1936-cı il iyulun 10-da Naxçıvan şəhərində anadan olmuşdur. 1953-57-ci illərdə Azərbaycan Dövlət Pedaqoji Xarici Dillər İnstitutunda təhsil almışdır. Sonra uzun illər pedaqoji fəaliyyət göstərmiş, fransız dilindən dərs demişdir. Müxtəlif vaxtlarda C.Məmmədquluzadə adına Naxçıvan Dövlət Musiqili Dram Teatrında və Naxçıvan Dövlət Kukla Teatrında ədəbi hissə müdiri vəzifəsində çalışmış, 2002-2005-ci illərdə “Ümid çırağı” jurnalının baş redaktoru olmuşdur.

Fəal bədii yaradıcılığa 1957-ci ildən başlamış Kəmalə Ağayeva “Azərbaycan” jurnalında “Hilal olaydım” adlı ilk mətbu şeiri dərc edilmişdir. Ədibin “Məhsəti”, “İsmət”, “O, bizim dağların oğludur”, “Mənim tanrım gözəllikdir, sevgidir”, “Apardı sellər Saranı”, “Göyçək Fatma”, “Tıq- tıq xanım”, “Məlikməhəmməd” və “Sirli sözlər” pyesləri tamaşaya qoyulmuş, efirdə səslənmiş, tamaşaçıların və dinləyicilərin rəğbətini qazanmışdır.

Kəmalə Ağayeva bədii tərcümə ilə də məşğul olmuş, fransız şairləri Pol Elüar, Pol Verlen, Lui Araqon və b. əsərlərini Azərbaycan dilinə çevirmişdir.

Həmçinin ictimai fəaliyyəti ilə də tanınmış, Azərbaycan KP Naxçıvan Vilayət Partiya Komitəsinin (1965-1983), Azərbaycan Yazıçılar Birliyinin Təftiş komissiyasının (1981-1983) və Kitabsevərlər cəmiyyəti idarə heyətinin üzvü, Naxçıvan Şəhər Sovetinin deputatı (1982), keçmiş ittifaq respublikalarında, xarici ölkələrdə keçirilmiş müxtəlif ədəbiyyat tədbirlərinin, görüşlərin iştirakçısı olmuşdur.

“Baharın sözü”, “Gül yarpağı”, “Sən olmasaydın”, “Arpaçayın nəğməsi”, “Daş piyalə”, “O dağlarda gözüm qaldı”, “Vətənə sevdalıyam”, “Qönçələr” və digər maraqlı kitabları ədibə geniş oxucu auditoriyası qazandırmışdır.

Yaradıcılığı oxucularla yanaşı, dövlət tərəfindən də yüksək qiymətləndirilmişdir. 1984-cü ildə Əməkdar mədəniyyət işçisi, 2002-ci ildə Əməkdar incəsənət xadimi fəxri adlarına, 2003-cü ildə isə Azərbaycan Respublikası Prezidentinin fərdi təqaüdünə layiq görülmüşdür.

Azərbaycan Respublikasının Mədəniyyət Nazirliyi Kəmalə Ağayevanın vəfatı ilə bağlı mərhumun yaxınlarına və əzizlərinə dərin hüznlə başsağlığı verir.

Allah rəhmət eləsin.

Mədəniyyət.- 2019.- 24 iyul. S. 6.