Sumqayıt teatrında “Dəfn edilməmiş ölülər”

Sartrın məşhur əsəri gənc rejissorun təfsirində

Sumqayıt Dövlət Dram Teatrı bu dəfə səhnəsini gənclərə verib. Azərbaycan Dövlət Mədəniyyət və İncəsənət Universitetinin diplomçusu, rejissor, Əməkdar incəsənət xadimi Mehriban Ələkbərzadənin tələbəsi olmuş Ümid Abbas dünya ədəbiyyatının nəhənglərindən olan Jan Pol Sartrın yaradıcılığına müraciət edərək yazıçının “Dəfn edilməmiş ölülər” psixoloji dramını teatrın əməkdaşlarının iştirakı ilə tamaşaya qoyub.

İyunun 18-də teatrın səhnəsində nümayiş olunan tamaşada rolları Əməkdar artist Cəlal Məmmədov, aktyorlar İlahə Səfərova, Şəmistan Süleymanlı, Kamran Muradlı və Aynur Hümmətova canlandırır. Gənc rejissor Nobel mükafatçısı yazıçı-dramaturqun əsərinə maraqlı səhnə həlli verərək dünyanın əzəli və əbədi mövzusu olan ölüm və olum fəlsəfəsini, müharibələrin daim faciə, səfalət və insanlara bəlalar gətirməsi ilə sona yetməsini öz dəst-xətti ilə təqdim edir.

Xalq artisti, rejissor Cənnət Səlimova, Mədəniyyət və İncəsənət Universitetinin rektoru, professor Ceyran Mahmudova, universitetin professoru Fikrət Sultanov, Rusiya Dövlət Teatr və İncəsənət İnstitutunun professoru, dövlət imtahan komissiyasının sədri Aleksandr Barmak, komissiya üzvlərindən Sumqayıt Dövlət Dram Teatrının direktoru, Əməkdar artist Mübariz Həmidov və başqaları tamaşa ilə bağlı öz fikir və tövsiyələrini bildirib, uğurlu tamaşa ilə əlaqədar gənc rejissoru və teatrın aktyorlarını təbrik ediblər.

Mədəniyyət.- 2019.- 21 iyun.- S.5.