Görkəmli jurnalist, alim, pedaqoq
Azərbaycan jurnalistikasına ağır
itki üz verib. Görkəmli alim,
Azərbaycan Respublikası
Prezidentinin fərdi təqaüdçüsü, Əməkdar
jurnalist, Bakı Dövlət Universiteti Mətbuat tarixi və ideoloji iş metodları kafedrasının professoru
Şirməmməd Hüseynov
2019-cu il iyunun 24-də
ömrünün 95-ci ilində
vəfat edib.
Şirməmməd Ağaməmməd oğlu
Hüseynov 1924-cü il dekabrın 17-də
Şəki şəhərində
anadan olub. 1945-1950-ci illərdə indiki Bakı Dövlət Universitetinin Filologiya fakültəsinin Jurnalistika
şöbəsində ali təhsil alıb. Daha sonra M.Lomonosov adına Moskva
Dövlət Universiteti
Jurnalistika fakültəsinin
aspiranturasına daxil olub, 1954-cü ildə dissertasiya müdafiə edərək tarix elmləri namizədi elmi dərəcəsi alıb.
1954-cü
ildən indiki Bakı Dövlət Universiteti Filologiya fakültəsinin Jurnalistika
kafedrasında elmi-pedaqoji
fəaliyyətə başlayan
Şirməmməd Hüseynov
həyatını universitetə
bağlayaraq ömrünün
sonunadək burada baş müəllim, dosent, 1962-1969-cu illərdə
Filologiya fakültəsinin
dekan müavini,
1970-1976-cı illərdə Jurnalistika fakültəsinin
dekanı, 1976-1988-ci illərdə
Mətbuat tarixi və ideoloji iş metodları kafedrasının müdiri
olub, 1988-ci ildən ömrünün sonunadək
həmin kafedranın professoru vəzifəsində
çalışıb.
Şirməmməd Hüseynovun vəfatı ilə bağlı Azərbaycan Respublikasının
Prezidenti İlham Əliyev, Birinci vitse-prezident Mehriban Əliyeva, dövlət və hökumət rəsmiləri adından rəsmi nekroloq yayımlanıb.
Nekroloqda bildirilir ki, elmi fəaliyyətini, əsasən, Azərbaycan
jurnalistikası tarixinin
öyrənilməsinə həsr
edən Şirməmməd
Hüseynov mətbuatşünaslığa
dair 30-dan çox kitab və monoqrafiyanın,
800-dən artıq elmi
və elmi-publisistik məqalənin müəllifidir. Görkəmli
alim və pedaqoq Azərbaycan klassik jurnalistikasının
görkəmli simaları
Həsən bəy Zərdabi, Əli bəy Hüseynzadə, Məhəmməd Əmin
Rəsulzadə, Üzeyir
Hacıbəyli, Əhməd
Ağaoğlu, Cəlil
Məmmədquluzadə irsini
hərtərəfli araşdıraraq
yetişməkdə olan
nəslə çatdırılmasında
təqdirəlayiq xidmətlər
göstərib. Alimin Azərbaycan
Xalq Cümhuriyyəti
qurucularının fəaliyyətinə
dair araşdırmalarının
Azərbaycan tarixinin öyrənilməsində xüsusi
əhəmiyyəti var.
Şirməmməd Hüseynovun Azərbaycan jurnalistikasının inkişafında
uzunmüddətli səmərəli
fəaliyyəti yüksək
qiymətləndirilib. O, bir sıra mükafatlara layiq görülüb, “Şərəf” ordeni ilə təltif olunub.
İyunun 25-də Bakı Dövlət Universitetində görkəmli
jurnalist, alim və pedaqoqla vida mərasimi keçirilib. Mərasimdə Azərbaycan Respublikası
Prezidenti Administrasiyasının
rəhbəri Ramiz Mehdiyev, dövlət və hökumət rəsmiləri, millət vəkilləri, ziyalılar,
ictimaiyyət nümayəndələri
iştirak ediblər.
Mərasimdə çıxış edən
BDU-nun rektoru Elçin
Babayev bildirib ki, Şirməmməd Hüseynov yüzlərlə
jurnalistin ustadı olub. O, azərbaycançılıq ideologiyasının carçılarından
idi.
Azərbaycan Respublikası Prezidenti Administrasiyasının Humanitar
siyasət məsələləri
şöbəsinin müdiri
Fərəh Əliyeva
vida mərasiminə gələnlərə təşəkkür
edib. “Atam çox
şərəfli və
ləyaqətli ömür
yaşayıb. Bu ömür yolunda qoyduğu miras onun təmiz adı, ləyaqəti idi”, – deyə o bildirib.
Vida mərasimindən sonra Şirməmməd Hüseynovun cənazəsi son mənzilə yola salınıb. Mərhum II Fəxri xiyabanda torpağa tapşırılıb.
Allah rəhmət eləsin.
Mədəniyyət.- 2019.- 26 iyun.-
S.1-2.