Yüz yaş qeyd ediləcək: bir az gec-tezi var...

Bu ilin payızında, yəni qarşıdakı teatr mövsümündə S.Vurğun adına Azərbaycan Dövlət Akademik Rus Dram Teatrının 100 yaşı tamam olacaq. Teatrın kollektivi yubileylə bağlı tədbirlərə məlum səbəblər üzündən virtual məkanda başlamağa qərar verib.

Bununla bağlı teatrın saytında sənət ocağının tarixində son illər baş vermiş əlamətdar hadisələr barədə materiallar yer almaqdadır. Saytın istifadəçilərinə premyeralar, xarici səfərlər, yubiley axşamları, Rusiya və digər ölkələrin aparıcı teatrlarının bu teatrın səhnəsindəki qastrol tamaşaları barədə videomateriallar təqdim edilir.

Bölmədəki ilk material 26 may 2008-ci il tarixinə aiddir. Həmin gün Azərbaycan Respublikasının Prezidenti İlham Əliyev və birinci xanım Mehriban Əliyeva bərpa və təmir olunmuş teatr binasının açılışında iştirak etmişdilər.

Bölmədə 2010-cu il 21 dekabr tarixində keçirilən teatrın 90 illik yubileyindən, tamaşalardan fraqmentlər, 2015-ci ildə teatrın “Maskarad” və “Fedra” tamaşaları ilə yollandığı Sankt-Peterburq qastrolundan materiallar da yer alıb. 100 illiyə həsr olunmuş videoxülasələrin sayı mütəmadi olaraq artır, bölmənin materialları zənginləşir.

G.MİRMƏMMƏD

Mədəniyyət.-2020.- 10 aprel.- S.3.