Kitabxanalar tarix yazan igidləri oxuculara tanıdır

Bakı Şəhər Mədəniyyət Baş İdarəsi Yasamal rayon MKS-nin M.Ş.Vazeh adına Mərkəzi Kitabxanasının İnformasiya-resurs şöbəsi işğal altındakı torpaqlarımızın azad edilməsi uğrunda canını fəda edən Vətən övladlarını tanıtmaq məqsədilə “Tarix yazan igidlərimiz” adlı layihə həyata keçirir.

Layihə çərçivəsində kitabxananın hazırladığı ilk videoçarx kiçik çavuş Şahin Hüseynli haqqındadır.

1995-ci il təvəllüdlü Şahin Hüseynli Füzuli-Cəbrayıl istiqamətində döyüşlərdə xeyli düşmən qüvvəsini məhv edərək şəhid olub.

Videoçarxda Şahin Hüseynlinin qısa ömür yolu, nümunəvi hərbi xidməti barədə bəhs edilir, təltif edildiyi diplomlar diqqətə çatdırılır.

Anası Tərgül xanım xatirələrini bölüşüb. O, oğlu ilə son görüşünü xatırlayaraq deyib: “Şahin gedərkən mənə doğru döndü və hərbi salamını verərək “Vətən uğrunda döyüşə gedirəm. Şəhid olsam, ağlama, başını dik tut!” söylədi”.

***

Bakı Şəhər Mədəniyyət Baş İdarəsi Xəzər rayon MKS-nin Mərkəzi Kitabxanası şəhid Məmmədağa Səfərov haqqında məlumat saatı təşkil edib. Məlumat saatında şəhidin ömür yolundan söhbət açılır.

Bildirilir ki, Məmmədağa Balakişi oğlu Səfərov 1997-ci il mayın 10-da Bakıda anadan olub. Yasamal rayonu A.Hüseynzadə adına 20 nömrəli tam orta məktəb-liseydə oxuyub. Türkiyənin Balıkəsir Universitetinə daxil olub. Son kursda Vətənə qayıdaraq hərbi xidmətə gedəcəyini və təhsilini sonra davam edəcəyini bildirib.

2019-cu ilin oktyabrında əsgəri xidmətə yollanır. Bu ilin 27 sentyabrında Vətən müharibəsi başlayandan sonra Cəbrayıl, Füzuli rayonlarının azad edilməsi uğrunda döyüşlərdə iştirak edir. Oktyabrın 21-də Füzuli istiqamətində gedən döyüşlərdə şəhidlik zirvəsinə yüksəlir.

Məmmədağa Səfərov doğma torpaqlarımızı düşməndən xilas etmək məqsədilə silaha sarılan qəhrəman Vətən oğlu kimi yaddaşlarda əbədi yaşayacaq.

Şəhidin adı Türkiyədə oxuduğu universitetdə də xatirə diplomu – “Şükran beratı” ilə əbədiləşdirilib.

Mədəniyyət.- 2020.- 16 dekabr.- S.4.