Vyana Ştraus Festival Orkestrinin Bakıda növbəti konserti

Fevralın 8-də Heydər Əliyev Mərkəzində Vyana Ştraus Festival Orkestrinin konserti olub. Konsert orkestrin yaradıcısı və bədii rəhbəri Peter Qutun rəhbərliyi ilə keçib.

Konsertdən əvvəl Peter Qut möhtəşəm memarlıq üslubunda inşa olunan Heydər Əliyev Mərkəzində artıq dördüncü dəfə çıxış etməkdən məmnunluğunu bildirib. O, proqramda dünya şöhrətli avstriyalı bəstəkar, “valsın kralı” İohann Ştrausun, həmçinin digər Vyana klassiklərinin – ata İohann Ştraus, Yozef Lanner, Robert Stolz, Yozef Ştraus, Eduard Ştraus və Karl Mixael Tsirerin əsərlərinin yer aldığını diqqətə çatdırıb.

Peter Qut konsert zamanı Ştraus dövrünün ənənələrinə sadiq qalaraq həm skripkada ifa edib, həm də dirijorluq edib. Əsərlərin yüksək peşəkarlıqla təqdim olunduğu, tamaşaçılarla səmimi ünsiyyət şəraitində keçən konsert maraqla qarşılanıb.

Xatırladaq ki, məşhur kollektiv 2014-cü, 2016-cı və 2018-ci illərdə də Bakıda – Heydər Əliyev Mərkəzində çıxış edib.

Vyana Ştraus Festival Orkestri 1978-ci ildən fəaliyyət göstərir. Vyana musiqi ənənələrinin qoruyucusu olan kollektiv klassik əsərlərdən, o cümlədən Ştrauslar sülaləsinin bəstələrindən ibarət geniş repertuarı ilə dünyada şöhrət qazanıb.

Mədəniyyət.- 2020.- 12 fevral.- S.8.